1. اردو محفل سالگرہ پانزدہم

    اردو محفل کی یوم تاسیس کی پندرہویں سالگرہ کے موقع پر تمام اردو طبقہ و محفلین کو دلی مبارکباد!

    اعلان ختم کریں

فراز میں زندہ ہوں

میم الف نے 'پسندیدہ کلام' کی ذیل میں اس موضوع کا آغاز کیا، ‏نومبر 16, 2019

ٹیگ:
  1. میم الف

    میم الف محفلین

    مراسلے:
    294
    جھنڈا:
    Pakistan
    موڈ:
    Fine
    میں ابھی زندہ ہوں
    تم نے سنگباری کی
    مرے پیکر کو دیواروں کے قالب میں چنا
    ناگوں سے ڈسوایا
    صلیبوں پر چڑھایا
    زہر پلوایا
    جلایا
    پھر بھی میں سچ کی طرح پایندہ ہوں
    میں زندہ ہوں
    میرا چہرہ‘ میری آنکھیں‘ میرے بازو
    میرے لب
    زندہ ہیں سب
    میں شہابِ شب
    ہزاروں بار ٹوٹا
    اور بکھرا
    پھر بھی میں رخشندہ ہوں
    میری طاقت میرے بالوں میں
    نہ میرے ناخنوں میں تھی نہاں
    میں حصاروں میں چھپا تھا
    — اور نہ تیغوں کی پناہوں میں چلا
    میری طاقت‘ میری قوت
    حرف تھا
    سلسبیلِ حرف سے میں نے پیا
    آبِ بقا
    حرف جو سچائیوں کی ابتدا اور انتہا
    وجدان کی شمعِ نوا
    سب کا خدا
    تم نے کالے سورجوں کو
    اپنے ہاتھوں پر دھرا
    مصنوعی مہتابوں کو
    ماتھوں پر چنا
    کافور کی شمعوں سے طاقِ ذات کو
    روشن کیا
    تم نے چاہا تھا
    کہ خال و خد تمھارے بھی
    کہیں چمکیں
    تمھیں بھی لوگ پہچانیں
    تمھیں بھی دیوتا مانیں
    مگر تم شکل سے عاری تھے
    صورت گر بھی کیا کرتے
    تمھارے جسم بے توقیر و بے جاں
    اور تمھارے تاج طاقوں پر دھرے ہیں
    اور تمھارے پیرہن
    تابوت کا استر بنے
    خاکستری ڈھانچوں کو ڈھانپے
    اب عجائب گھر کے تہ خانوں میں سڑتے ہیں
    تمھارے استخواں نوواردوں کی چاپ سے
    یوں کانپ اُٹھتے ہیں
    کہ جیسے صبحِ محشر کا بلاوا ہو
    سنو اے کجکلاہو!
    سنو اے خداوندو!
    اب تم فقط ماضی ہو
    میں آیندہ ہوں
    میں نہ اپنے دوش سے نادم‘ نہ اپنے حال سے شرمندہ ہوں
    میں زندہ ہوں
    تابندہ ہوں
    رقصندہ ہوں
    پایندہ ہوں


     
    • پسندیدہ پسندیدہ × 2

اس صفحے کی تشہیر