میر میر تقی میر ::::: مُدّت ہوئی کہ بیچ میں پیغام بھی نہیں ::::: Mir Taqi Mir

طارق شاہ

محفلین

غزلِ

میر تقی میر


مُدّت ہوئی کہ بیچ میں پیغام بھی نہیں
نامے کا اُس کی مہر سے اب نام بھی نہیں

ایّامِ ہجْر کریے بسر کِس اُمید پر
مِلنا اُنھوں کا صُبح نہیں، شام بھی نہیں

پَروا اُسے ہو کاہےکو، ناکام گر مَرُوں
اُس کام جاں کو مجھ سے تو کُچھ کام بھی نہیں

رووَیں اِس اِضطراب دِلی کو کہاں تلک
دِن رات ہم کو، ایک دَم آرام بھی نہیں

کیا جانوں دِل کو کھینْچے ہیں کیوں شعر مِیر کے
کچھ طرز ایسی بھی نہیں، ایہام بھی نہیں

میر تقی میر
 
Top