میرے پسندیدہ اشعار

[گُلِ یاسمیں]

ہمیں بھی عرض تمنا کا ڈھب نہیں آتا
مزاج یار بھی سادہ ہے کیا کیا جائے

احمد فراز

 

[محمد شان محسن]

محمد شان محسن صاحب اردو محفل میں خوش آمدید۔

اپنا تعارف تو دیں، تاکہ دوسرے اراکین اردو محفل آپ سے متعارف ہو سکیں۔

یہ رہا تعارف کا زمرہ

غالبؔ ہمیں نہ چھیڑ کہ پھر جوش اشک سے
بیٹھے ہیں ہم تہیۂ طوفاں کیے ہوئے

 

[گُلِ یاسمیں]

جس کو طوفان سے الجھنے کی عادت ہو محسن
ایسی کشتی کو سمندر بھی دعا دیتا ہے

 

[حسرت جاوید]

یوں لگے تیرے تذکرہ سے، اگر
نام میرا ہٹا دیا جائے

جیسے اک پھول کی کہانی سے
ذکرِ خوشبو اڑا دیا جائے

وسیم بریلوی

 

[گُلِ یاسمیں]

وہ عطر خاک اب کہاں پانی کی باس میں
ہم نے بدل لیا ہے پیالہ گلاس میں

آفتاب اقبال شمیم

 

[حسرت جاوید]

حُسنِ بیگانہِ احساسِ جمال اچھا ہے
غنچے کِھلتے ہیں تو بِک جاتے ہیں بازاروں میں

ذکر کرتے ہیں تیرا مجھ سے با عنوانِ جفا
چارہ گر پھول پِرو لائے ہیں تلواروں میں


احمد ندیم قاسمی

 

[گُلِ یاسمیں]

چاند میری طرح پگھلتا رہا
نیند میں ساری رات چلتا رہا
جانے کس دُکھ سے دل گرفتہ تھا
مُنہ پہ بادل کی راکھ ملتا رہا

پروین شاکر

 

[حسرت جاوید]

جب بھی دیکھا ہے تُجھے عالمِ نو دیکھا ہے
مرحلہ طے نہ ہوا تیری شناسائی کا

احمد ندیم قاسمی

 

[شمشاد]

انہیں تو ستم کا مزا پڑ گیا ہے
کہاں کا تجاہل کہاں کا تغافل
بیخود دہلوی

 

[محمد شان محسن]

آنکھیں ساقی کی سلامت میرے دشمن ترسیں
دوہرے میخانے ہیں نیت میری بھرنے کے لیے

 

[شمشاد]

بعد خط آنے کے اس سے تھا وفا کا احتمال
لیکن واں تک عمر نے اپنی وفاداری نہ کی
قائم چاندپوری

 

[سیما علی]

اس شہر میں کتنے چہرے تھے کچھ یاد نہیں سب بھول گئے
اک شخص کتابوں جیسا تھا وہ شخص زبانی یاد ہوا

 

[شمشاد]

اسے خبر ہے کہ انجام وصل کیا ہوگا
وہ قربتوں کی تپش فاصلے میں رکھتی ہے
خالد یوسف

 

[سیما علی]

سُن کر مرا فسانہِ غم ، اُس نے یہ کہا
دوچار جھوٹ سچ ! یہی خوبی زباں کی ہے
مرزا داغ دہلوی

 

[سیما علی]

وہ سراپا سامنے ہے، استعارے مسترد
چاند، جگنو، پھول، خوشبو اور ستارے مسترد
ظفر اقبال

 

[شمشاد]

کبھی کبھی تو یہ دل میں سوال اٹھتا ہے
کہ اس جدائی میں کیا اس نے پا لیا ہوگا
انوار انجم

 

[سیما علی]

جس دن سے اپنا طرز فقیرانہ چھٹ گيا
شاہی تو مل گئ دل شاہانہ چھٹ گيا
مصطفیٰ زیدی

 

[شمشاد]

محبتوں میں دکھاوے کی دوستی نہ ملا
اگر گلے نہیں ملتا تو ہاتھ بھی نہ ملا
بشیر بدر

 

[سیما علی]

نئی صبح پر نظر ہے مگر آہ یہ بھی ڈر ہے
یہ سحر بھی رفتہ رفتہ کہیں شام تک نہ پہنچے
شکیل بدایونی

 

[سیما علی]

دل روز سجاتا ہوں میں دلہن کی طرح سے
غم روز چلے آتے ہیں بارات کی مانند
محسن نقوی