فیض میرے ملنے والے ۔ فیض احمد فیض

[فرخ منظور]

میرے ملنے والے​

وہ در کھلا میرے غمکدے کا​

وہ آ گئے میرے ملنے والے​

وہ آگئی شام، اپنی راہوں میں​

فرشِ افسردگی بچھانے​

وہ آگئی رات چاند تاروں کو​

اپنی آزردگی سنانے​

وہ صبح آئی دمکتے نشتر سے​

یاد کے زخم کو منانے​

وہ دوپہر آئی آستیں میں​

چھپائے شعلوں کے تازیانے​

یہ آئے سب میرے ملنے والے​

کہ جن سے دن رات واسطا ہے​

پہ کون کب آیا، کب گیا ہے​

نگاہ و دل کو خبر کہاں ہے​

خیال سوئے وطن رواں ہے​

سمندروں کی ایال تھامے​

ہزار وہم وگماں سنبھالے​

کئی طرح کے سوال تھامے​

بیروت 80 ؁​

(فیض احمد فیض)