میرے پسندیدہ اشعار

[شمشاد خان]

شب فرقت کا جاگا ہوں فرشتو اب تو سونے دو
کبھی فرصت میں کر لینا حساب آہستہ آہستہ
(امیر مینائی)

 

[فلک شیر]

ہم تو جانے کب سے ہیں آوارہ ظلمت مگر
تم ٹھہر جاؤ تو پل بھر میں گزر جائے گی رات
سرور بارہ بنکوی

 

[شمشاد خان]

عذر آنے میں بھی ہے اور بلاتے بھی نہیں
باعث ترک ملاقات بتاتے بھی نہیں

منتظر ہیں دم رخصت کہ یہ مر جائے تو جائیں
پھر یہ احسان کہ ہم چھوڑ کے جاتے بھی نہیں
(داغ دہلوی)

 

[مومن فرحین]

حسن کے سمجھنے کو عمر چاہیے جاناں
دو گھڑی کی چاہت میں لڑکیاں نہیں کھلتیں

پروین شاکر

 

[شمشاد خان]

کوئی پھول دھوپ کی پتیوں میں ہرے ربن سے بندھا ہوا
وہ غزل کا لہجہ نیا نیا نہ کہا ہوا نہ سنا ہوا

جسے لے گئی ہے ابھی ہوا وہ ورق تھا دل کی کتاب کا
کہیں آنسوؤں سے مٹا ہوا کہیں آنسوؤں سے لکھا ہوا
(بشیر بدر)

 

[مومن فرحین]

اتنا سا یاد رکھ مجھے
جیسے کسی کتاب میں
بیتے دنوں کے دوست کا
اک خط پڑا ہوا ملے
لفظ مٹے مٹے سے ہوں
رنگ اڑا اڑا سا ہو
لیکن وہ اجنبی نہ ہو ۔۔

 

[شمشاد خان]

دو گھڑی بیٹھے تھے زلف عنبریں کی چھاؤں میں
چبھ گیا کانٹا دل حسرت زدہ کے پاؤں میں
(فارغ بخاری)

 

[مومن فرحین]

بسا لینا کسی کو دل میں دل ہی کا کلیجہ ہے
پہاڑوں کو تو بس آتا ہے جل کر طور ہو جانا

 

[شمشاد خان]

دور اور پاس کے ستائے ہیں
ہم نے ہجرت کے دکھ اٹھائے ہیں

جانے کس پار جا کے اتریں گے
خواب کے جو بھی در بنائے ہیں
(عاشق جعفری)

 

[مومن فرحین]

بین کرتے ہوئے لوگ آس بندھاتے ہوئے لوگ
اب کہاں ملتے ھیں اوروں کو ہنساتے ہوئے لوگ

 

[شمشاد خان]

آندھیاں غم کی چلیں اور کرب بادل چھا گئے
تجھ سے کیسے ہو ملن سب راستے دھندلا گئے

کرچی کرچی خواہشیں آنکھوں میں چبھ کر رہ گئیں
زرد موسم آس کی ہریالیوں کو کھا گئے
(عابدہ عروج)

 

[مومن فرحین]

نیند کا ہلکا گلابی سا خمار آنکھوں میں تھا
یوں لگا جیسے وہ شب کو دیر تک سویا نہ تھا
ہر طرف دیوار و در اور ان میں آنکھوں کے ہجوم
کہہ سکے جو دل کی حالت وہ لب گویا نہ تھا

 

[مومن فرحین]

ہوا ہے جب سے دل ناصبور بے قابو
کلام تجھ سے نظر کو بڑے ادب سے ہے

فیض احمد فیض

 

[شمشاد خان]

بہت خوبصورت ہو تم بہت خوبصورت ہو تم
کبھی میں جو کہہ دوں محبت ہے تم سے
تو مجھ کو خدا را غلط مت سمجھنا
کہ میری ضرورت ہو تم بہت خوبصورت ہو تم
(طاہر فراز)

 

[مومن فرحین]

یہ جو رنگین تبسم کی ادا ہے مجھ میں
مجھ کو لگتا ہے کوئی میرے سوا ہے مجھ میں

 

[شمشاد خان]

تری ہی شکل کے بت ہیں کئی تراشے ہوئے
نہ پوچھ کعبۂ دل میں بھی کیا تماشے ہوئے
(عامر امیر)

 

[مومن فرحین]

دیکھئیے اب نہ یاد آئیے آپ
جائیے آپ سے خفا ہوں میں

جون ایلیا

 

[شمشاد خان]

نیا اک رشتہ پیدا کیوں کریں ہم
بچھڑنا ہے تو جھگڑا کیوں کریں ہم

خموشی سے ادا ہو رسم دوری
کوئی ہنگامہ برپا کیوں کریں ہم
(جون ایلیا)

 

[مومن فرحین]

تمام عمر کہاں کوئی ساتھ دیتا ہے
یہ جانتا ہوں مگر تھوڑی دور ساتھ چلو

فراز

 

[شمشاد خان]

زحال مسکیں مکن تغافل دوراے نیناں بنائے بتیاں
کہ تاب ہجراں ندارم اے جاں نہ لیہو کاہے لگائے چھتیاں

شبان ہجراں دراز چوں زلف و روز وصلت چوں عمر کوتاہ
سکھی پیا کو جو میں نہ دیکھوں تو کیسے کاٹوں اندھیری رتیاں
(امیر خسرو)