طارق شاہ
محفلین
جوؔش ملیح آبادی
شام کیوں رقصاں نہ ہو صُبحِ جِناں کی چھاؤں میں
قُلقُلِ مِینا، پَر افشاں ہے، اذاں کی چھاؤں میں
زندگانی کا تموُّج ، نوجوانی کی ترنگ
چرخ زن ہے فرق پر ابرِ رَواں کی چھاؤں میں
موت ہے شرمندہ پیشِ آب و رنگِ زندگی
چاند ہے صد پارہ دامانِ کَتاں کی چھاؤں میں
زندگی بیٹھی ہے آکر آج اِک مُدّت کے بعد
گنبدِ شیریں لحان و مہوشاں کی چھاؤں میں
سُرخیوں کے تال ہیں سارنگیوں کے پُشت پر
بدلیوں کے شہر ہیں لحنِ مُغاں کی چھاؤں میں
آج پھر اُتری ہے شب افروز مُکھڑوں کی برات
خیمۂ تابندۂ رامِش گراں کی چھاؤں میں
سینکڑوں قوسوں کے سائے میں ہے رقصِ گُل رُخاں
سینکڑوں قوسیں ہیں، رقصِ گُل رُخاں کی چھاؤں میں
جس میں وجد انگیز راتیں ہیں بھری برسات کی
وہ دُھواں ہے گیسوئے عنبرفِشاں کی چھاؤں میں
شُکرِ اِیزد! آج پِھر رقصاں ہے رُوحِ کائنات
شہ پَرِ تخیّلِ جوؔشِ نکتہ داں کی چھاؤں میں
جوش ملیح آبادی