نصیر الدین نصیر مری نظر سے مکمل بہار گزری ہے - سید نصیر الدین نصیر

الف نظامی

لائبریرین
مری نظر سے مکمل بہار گزری ہے
کہ مُسکراتی ہوئی شکلِ یار گزری ہے

غم و الم کے ، اذیت کے ، کرب زاروں میں
تڑپ تڑپ کے شبِ انتظار گزری ہے

نفس نفس پہ چُبھن تھی قدم قدم پہ خلش
تمام عمر سرِ نوکِ خار گزری ہے

قفس میں حال نہ پوچھا صبا نے آکے کبھی
مرے قریب سے بیگانہ وار گزری ہے

سکونِ دل نہ میسر ہوا زمانے میں
نصیر زیست بڑی بے قرار گزری ہے

از " پیمانِ شب" از سید نصیر الدین نصیر
 
Top