محشرؔبدایونی ::::::گر ضربِ مخالفت نہ ہوگی::::::Mehshar Badayuni

[طارق شاہ]

غزل
محشرؔ بدایونی
گر ضربِ مخالفت نہ ہوگی
زندہ کبھی شخصیّت نہ ہوگی

بے راہ رَوی کی راہ چلیے
کوئی بھی مزاحمت نہ ہوگی

کی نقلِ رسُوم بھی تو ہم سے
بس نقلِ منافقت نہ ہوگی

بے سوچے ندائے حق نہیں دی
واقف تھے، کہ خیریت نہ ہوگی

اب چاہے یہ دِن بھی رات بن جائیں!
ظُلمت سے مصالحت نہ ہوگی

جو شہر کی زَمِیں پہ بوئی جائے
اُس فصل سے منفعت نہ ہوگی

کیا سوچ کے گھر بنائیں کم اجر !
دِیواریں ہُوئیں، تو چھت نہ ہوگی

لاکھ آتشِ پا ہے کہ، دَم لو !
توہِینِ مُسافرت نہ ہوگی

ہر شخص کو خوش نہ رکھ سکے ہم
ہم میں وہ صلاحیّت نہ ہوگی

محشرؔ بدایونی
1994 - 1922​