مجھ سے اونچا ترا قد ہے، حد ہے۔۔۔ اطیب جازل

[محمد بلال اعظم]

مجھ سے اونچا ترا قد ہے، حد ہے
پھر بھی سینے میں حسد ہے، حد ہے

میرے تو لفظ بھی کوڑی کے نہیں
تیرا نقطہ بھی سند ہے، حد ہے

تیری ہر بات ہے سر آنکھوں پر
میری ہر بات ہی رد ہے، حد ہے

عشق میری ہی تمنا تو نہیں
تیری نیت بھی تو بد ہے، حد ہے

زندگی کو ہے ضرورت میری
اور ضرورت بھی اشد ہے، حد ہے

بے تحاشہ ہیں ستارے لیکن
چاند بس ایک عدد ہے، حد ہے

اشک آنکھوں سے یہ کہہ کر نکلا
یہ تیرے ضبط کی حد ہے؟ حد ہے

روکتے کیوں نہیں اس کو جازل
یہ جو سانسوں کی رسد ہے، حد ہے

اطیب جازل​

 

[فرقان احمد]

عمدہ شراکت ہے محترم محمد بلال اعظم

 

[حسن محمود جماعتی]

عمدہ شراکت۔ زبردست۔ کچھ ہی عرصہ پہلے اس کلام کے چند اشعار سے آشنائی ہوئی تھی آج مکمل پڑھنے کو مل گیا۔