قطعات - احمد فقیہہ
مجموعہ کلام "ڈھیر زرد پتوں کا" سے انتخاب
مجموعہ کلام "ڈھیر زرد پتوں کا" سے انتخاب
کاروبارِ امیر تو دیکھو
قیصری میں خراج لیتا ہے
یہ گدا گر ہماری محنت کا
ہم کو بدلے میں بھوک دیتا ہے
۔۔۔۔۔۔۔۔۔۔
بیج کر نام خدا کا جو دوکاں چمکائیں
عمر بھر ان سے یہ طے ہے کہ ٹھنے گی اپنی
ہم وہ دیوانے کہ پتھر بہ سر و چشم مگر
شیخ و ملا سے بنی ہے نہ بنے گی اپنی
۔۔۔۔۔۔۔۔۔۔۔۔
مرا یقین و عقیدہ برابری کا چلن
مری نظر میں کوئی آقا و غلام نہیں
مری کتاب کہ ہے سرگذ شت آدم کی
امیر شہر سے مجھ کو کوئی کلام نہیں
۔۔۔۔۔۔۔۔۔۔۔۔
چراغ کوئی جلائے وہاں اصولوں کے
کہ سر کٹے جہاں دیکھے گئے رسولوں کے
رتیں وہ سرخ ، ہرے موسموں کی بانجھ ہوئیں
گلاب اگتے ہیں اب شہر میں ببولوں کے
۔۔۔۔۔۔۔۔۔۔۔۔
زور و زر اور ظلم کی بنیاد پر
سب زمانے سب تمدن ایک تھے
حرفِ حق کی جب بات چھیڑی فقیہہ
میرے سارے دوست دشمن ایک تھے!
۔۔۔۔۔۔۔۔۔۔۔
تاریک سیاہ اندھیروں میں
ہر سچّا حرف سویرا ہے
مندر سے ملے یا مسجد سے
جس در سے ملے وہ میرا ہے
۔۔۔۔۔۔۔۔۔۔۔
فرصتِ خوش دلی ملی کس کو
کاروبارِ ہوس کی گلیوں میں
قتل گاہ دہر میں ہو پیدا
ایک گوتم ہزار صدیوں میں
