قدم قدم پہ کسی امتحاں کی زد میں ہے ۔ آفتاب حسین

[فرخ منظور]

قدم قدم پہ کسی امتحاں کی زد میں ہے​

زمین اب بھی کہیں آسماں کی زد میں ہے​

​

ہر ایک گام اُلجھتا ہوں اپنے آپ سے میں​

وہ تیر ہوں جو خود اپنی کماں کی زد میں ہے​

​

وہ بحر ہوں جو خود اپنے کنارے چاٹتا ہے​

وہ لہر ہوں کہ جو سیلِ رواں کی زد میں ہے​

​

میں اپنی ذات پہ اصرار کر رہا ہوں، مگر​

یقیں کا کھیل مسلسل گماں کی زد میں ہے​

​

مرے وجود کے اندر اُترتا جاتا ہے​

ہے کوئی زہر جو میری زباں کی زد میں ہے​

​

لگی ہوئی ہے نظر آنے والے منظر پر​

مگر یہ دل کہ ابھی رفتگاں کی زد میں ہے​

​

یہی نہیں کہ فقط رزقِ خواب بند ہوا​

گدائے کوئے ہنر بھی سگاں کی زد میں ہے​

​

افق افق جو مرے نور کا غبار اُڑا​

یہ کائنات مرے خاکداں کی زد میں ہے​

​

(آفتاب حسین)​