عرفان صدیقی غزل ۔ خوشبو کی طرح ساتھ لگا لے گئی ہم کو ۔ عرفان صدیقی

[محمداحمد]

غزل​

​

خوشبو کی طرح ساتھ لگا لے گئی ہم کو​

کوچے سے ترے بادِ صبا لے گئی ہم کو​

​

پتھر تھے کہ گوہر تھے، اب اس بات کا کیا ذکر​

اک موج بہرحال بہا لے گئی ہم کو​

​

پھر چھوڑ دیا ریگِ سرِ راہ سمجھ کر​

کچھ دور تو موسم کی ہوا لے گئی ہم کو​

​

تم کیسے گرے آندھی میں چھتنار درختو؟​

ہم لوگ تو پتے تھے، اُڑا لے گئی ہم کو​

​

ہم کون شناور تھے کہ یوں پار اُترتے​

سوکھے ہوئے ہونٹوں کی دعا لے گئی ہم کو​

​

اس شہر میں غارت گرِ ایماں تو بہت تھے​

کچھ گھر کی شرافت ہی بچا لے گئی ہم کو​

​

عرفان صدیقی​

 

[قرۃالعین اعوان]

عمدہ!

 

[محمد بلال اعظم]

سبحان اللہ
سبحان اللہ
سبحان اللہ