غزل: فکرِ منزل سے پرے، سود و زیاں سے آگے ٭ مفتی تقی عثمانی

فکرِ منزل سے پرے، سود و زیاں سے آگے
وادیِ عشق ہے ”کیوں“ اور ”کہاں“ سے آگے

عشق کے در پہ ملی راحتِ ایمان و یقیں
عقل بڑھتی ہی نہ تھی وہم و گماں سے آگے

درگہِ حسن میں ٹوٹے ہوئے لفظوں پہ نہ جا
لطفِ اظہار ہے الفاظ و بیاں سے آگے

جس جگہ فکر کی پرواز بھی دم توڑ گئی
ہے ترےؐ علم کا فیضان وہاں سے آگے

کیسے معلوم ہو تجھ کو کہ مسرت کیا ہے؟
تو نے دیکھا ہی نہیں عمرِ رواں سے آگے

کرب و حسرت کی قلم رو تھی ترے غم سے اِدھر
چین ہی چین ہے بس اب تو یہاں سے آگے

٭٭٭
مفتی تقی عثمانی
 
Top