غزل : عشق جب بن کے خدا دل کے قریں رہتا ہے

[فاروق درویش]

عشق جب بن کے خدا دل کے قریں رہتا ہے
پھر زمانے کے کہاں زیر ِ نگیں رہتا ہے

آج خوابوں کے طلسمات میں کھوئی ہے حیات
کل ہی مل جائے گی تعبیر یقیں رہتا ہے

روشنی ڈھونڈنے نکلا تھا جو میخانوں میں
قصر ِ ظلمت میں وہ اب تخت نشیں رہتا ہے

منزل عشق کی راہوں کے مسافر ہم لوگ
دشت ِ لیلیٰ میں ہی ہر قیس مکیں رہتا ہے

بے حجابی ہے تری مہر ِ منور کی طرح
چاند بدلی سے جو نکلے تو حسیں رہتا ہے

قید ِ تنہائی سے نکلے گا تو مر جائے گا
دل جو محمل کے قریں گوشہ نشیں رھتا ہے

جب سے اترا ہے وہ نظروں میں حسیں ماہِ جبیں
دل کے پردوں میں کہیں پردہ نشیں رہتا ہے

میں گدائے شہہ ِ لولاک، دو عالم ہیں مرے
میری نظروں میں یہیں خلد ِ بریں رہتا ہے

رات درویش کی آنکھوں میں چمکتے ہیں نجوم
دل میں اک چاند حسیں سجدہ نشیں رہتا ہے


فاروق درویش

 

[محمد وارث]

واہ کیا کہنے جناب، بہت خوب۔

 

[الف عین]

احمد مشتاق کی زمین میں اچھی غزل ہے، بس دو اشعار ذرا قابلِ توجہ ہیں۔
میں گدائے شہہ ِ لولاک، دو عالم ہیں مرے
میری نظروں میں یہیں خلد ِ بریں رہتا ہے
۔۔۔ خلد بریں رہتا ہے؟؟

رات درویش کی آنکھوں میں چمکتے ہیں نجوم
دل میں اک چاند حسیں سجدہ نشیں رہتا ہے
غالباً یہاں چاند میں اضافت کا استعمال ہے، یہ ہندی لفظ ہے اس کے ساتھ اضافت جائز نہیں۔اس کو بآسانی مہرِ حسیں سے بدلا جا سکتا ہے، کہ ماہِ حسیں میں دو ہا قسم کی آوازوں کا متصل ہونا اچھا تاثر نہیں چھوڑتا۔

 

[فاروق درویش]

برادرم محترم محمد وارث صاحب ممنون ھوں محبتوں کا ۔۔۔۔۔۔۔۔ مجھ جیسا ادب کا اک ادنی سا طالب علم اس علمی شخصیت کی طرف سے پزیرائی اور حوصلہ افزائی پرپھولا نہیں سما رہا جس کے علمی بلاگز کی بدولت اسے کچھ ٹوٹا پھوٹا لکھنا آیا وگرنہ گذشتہ تیس برس میں وہ کچھ نہ سیکھ پایا تھا جو آپ کے بلاگز کا مطالعہ کر کے حاصل ھوا۔۔۔۔۔۔۔۔۔۔اوراب میں آپ کے بلاگ کے مضامین فیس بک پر اپنے گروپس اور دوسری سائٹس پر نئے لکھنے والوں کی راھنمائی کیلئے باقاعدگی سے شایر کر رھا ھوں ۔۔۔۔۔۔۔۔۔۔۔۔۔۔۔۔ سدا خوش آباد و خوش مراد

 

[فاروق درویش]

محترم و مکرم الف عین صاحب ۔۔۔۔۔۔۔۔۔۔۔۔۔۔ آپ کی توجہ اورمحبت کیلئے انتہائی ممنون ھوں ۔۔ جی ھاں یہ غزل جناب احمد مشتاق صاحب کے مصرح کے سلسلے میں ایک فی البدیہہ مشاعرے میں کہی گئی تھی سو فی البدیہہ ھونے کی وجہ سے اس میں زبان کی غلطی ھو بھی سکتی ھے، ،، خلد بریں ،، کے حوالے سے عرض کرتا چلوں کہ ،، خلد،، مذکر ھے اس لئے میرے مطابق اسے ،، رھتا ھے،، درست ھے اور اس سلسلے میں میں مستند لغات اور بزرگ سخن ور حضرات سے رائے لے چکا ھوں ۔۔۔۔۔۔۔۔۔۔ چاند کی اضافت کے بارے آپ کی عالمانہ رائے سے سو فیصدی متفق اور شکر گزار ھوں ۔۔۔۔۔۔۔۔۔۔۔۔ امید ھے آئیندہ بھی آُ جیسے بزرگ دوست کی عالمانہ تنقید سے فیض یاب ھوتا رھوں گا ۔۔۔۔۔۔۔۔۔ خوش آباد

 

[محمد وارث]

برادرم محترم محمد وارث صاحب ممنون ھوں محبتوں کا ۔۔۔۔۔۔۔۔ مجھ جیسا ادب کا اک ادنی سا طالب علم اس علمی شخصیت کی طرف سے پزیرائی اور حوصلہ افزائی پرپھولا نہیں سما رہا جس کے علمی بلاگز کی بدولت اسے کچھ ٹوٹا پھوٹا لکھنا آیا وگرنہ گذشتہ تیس برس میں وہ کچھ نہ سیکھ پایا تھا جو آپ کے بلاگز کا مطالعہ کر کے حاصل ھوا۔۔۔۔۔۔۔۔۔۔اوراب میں آپ کے بلاگ کے مضامین فیس بک پر اپنے گروپس اور دوسری سائٹس پر نئے لکھنے والوں کی راھنمائی کیلئے باقاعدگی سے شایر کر رھا ھوں ۔۔۔۔۔۔۔۔۔۔۔۔۔۔۔۔ سدا خوش آباد و خوش مراد

ذرّہ نوازی ہے محترم آپ کی کہ آپ نے اس خاکسار کو کلماتِ تحسین سے نوازا وگرنہ من آنم کہ من دانم۔

اردو محفل پر آپ کی موجودگی ہمارے لیے اعزاز کی بات ہے، امید ہے گاہے گاہے تشریف لاتے رہیں گے اور اپنی شاعری اور علم سے ہمیں بھی نوازتے رہیں گے۔

والسلام