غزل: رات دل نشیں رہی

[مہدی نقوی حجاز]

غزل

رات دل نشیں رہی
صبح در کمیں رہی

وہ کبھی کہاں رہی
اور کبھی کہیں رہی

میں بھی ہم نہیں رہا
تو بھی تم نہیں رہی

دل سے سب اتر گئے
ایک مہ جبیں رہی

پھول چن لیا گیا
شاخ عمبریں رہی

غم بھی سوگ میں رہا
آس بھی حزیں رہی

جان رہ گئی مگر
جانِ جاں نہیں رہی

ناز اٹھا لیے گئے
خوئے نازنیں رہی

خاک جائداد تھی
صرف اک زمیں رہی

ایک گھنٹہ ہو گیا
اور گھڑی وہیں رہی

میں خموش ہو گیا
آبرو دریں رہی

میں بھی لپٹا ہی رہا
وہ بھی آتشیں رہی

ہو گئے حجاز شل
چست وہ حسیں رہی

مہدی نقوی حجاز

 

[محمد اسامہ سَرسَری]

بہت ہی عمدہ جناب۔۔۔۔

 

[مہدی نقوی حجاز]

بہت ہی عمدہ جناب۔۔۔ ۔

آداب۔۔۔

 

[اعجاز احمدلودھی]

مختصر بحر میں خوب کلام۔

 

[سید ذیشان]

بہت خوب جناب۔

 

[ابن رضا]

خوب است.

وقت نے کیا کیا حسیں ستم
تم رھے نہ تم ھم رھے نہ ھم

عمبریں یا عنبریں؟ ٹائپو هے مهدی بھائی شاید

 

[ابن رضا]

 

[الف عین]

خوب، اگرچہ مقطع پسند نہیں آیا