عزیز لکھنوی :::: بتاؤں کیا، کہ میرے دِل میں کیا ہے :::: Aziz Lakhnavi

[طارق شاہ]

غزل
عزیز لکھنوی

بتاؤں کیا، کہ میرے دِل میں کیا ہے
سِوا تیرے، تِری محفِل میں کیا ہے

یہاں بھی تجھ کو تنہا میں نے پایا
تُو ہی تُو ہے بھری محفِل میں کیا ہے

کسی کے بُجھتے دِل کی ہے نِشانی
چراغِ سرحدِ منزِل میں کیا ہے

بجُز نقشِ پشیمانیِ قاتِل !
نگاہِ حسرتِ بسمِل میں کیا ہے

جفاؤں کی بھی حد ہوتی ہے کوئی
خُدا معلوُم اُس کے دِل میں کیا ہے

مآلِ ہَستیِ موہُوم معلوُم
عزیز اِس شُغلِ لاحاصِل میں کیا ہے

عزیز لکھنوی ​