حسرت موہانی :::::: شوق مُشتاقِ لقا صبر سے بیگانہ ہُوا :::::: Hasrat Mohani

طارق شاہ

محفلین

غزل
proxy.php

حسرؔت موہانی

شوق مُشتاقِ لقا صبر سے بیگانہ ہُوا
جب سے مشہوُر تِرے حُسن کا افسانہ ہُوا

ایک ہی کام تو یہ عِشق سے مَردانہ ہُوا
کہ ، تِرے شیوۂ ترکانہ کا دِیوانہ ہُوا

وصلِ جاناں، نہ ہُوا جان دِیئے پر بھی نصیب!
یعنی اُس جنسِ گرامی کا یہ بیعانہ ہُوا

بزمِ ساقی میں ہُوئے سب یونہی سیرابِ سرُور
مئے گُلِ رنگ سے لبریز جو پیمانہ ہُوا

حُسنِ جاناں کے تصوّر سے بڑھی، زینتِ دِل !
مَقدَمِ شہ، سَبَبِ رونَقِ کاشانہ ہُوا

ہم فقِیروں کی تواضع کو دُعائیں دِیجیے
کہ، اِسی سے تو مِزاج آپ کا شاہانہ ہُوا

پیروِ پِیرِ مُغاں تھا میں یہاں تک ،حسرتؔ!
کہ فنا ہو کے بھی، خاکِ رہِ میخانہ ہُوا

مولانا حسرؔت موہانی
 
Top