کاشفی
محفلین
شمعِ ہدایت
(جوش ملیح ابادی)
اے کہ تِرے جلال سے ہِل گئی بزمِ کافری
رَعشہء خوف بَن گیا رَقصِ بُتانِ آذرِی
خُشک عرب کی ریگ سے لَہر اُٹھی، نیاز کی
قُلزمِ نازِ حُسن میں، اُف ری تری شناوری
اے کہ تِرا غُبارِ راہ، تابشِ رُوئے ماہتاب
اے کہ تِرا نشان پا نازِشِ مَہرِ خاوری
اے کہ تِرے بیان میں، نغمہء صُلح و آشتی
اے کہ تِرے سُکوت میں، خندہء بندہ پروری
اے کہ تِرے دماغ پر جُنبشِ پَر تَوِ صفاء
اے کہ تِرے خمیر میں، کاوشِ نور گُستری
چھین لیں تُو نے مجلسِ شرک و خودی سے گرمیاں
ڈال دی تُونے پیکرِ لات و ہُبل میں تھَرتھری
تیرے قدم پہ جبہ سا روم و عجم کی نخوتیں
تیرے حضور سجدہ ریز، چین و عرب کی خودسری
تیرے کرم نے ڈال دی طرحِ خلوص و بندگی
تیرے غضب نے بند کی رسم و رہِ ستمگری
تیرے سخن سے دَب گئے لاف و گزاف کفر کے
تیرے نفس سے بُجھ گئی آتشِ سحر سامری
لحن سے تیرے منتظم پست و بلند کائنات
ساز سے تیرے مُنضبِط، گردشِ چرخ چنبری
چینِ ستم سے بے خبر تیری جبینِ دل کشی
حرفِ وفا سے تابناک تیری بیاضِ دلبری
تیری پیمبری کی یہ سب سے بڑی دلیل ہے
بخشا گدائے راہ کو تُونے شکوہِ قیصری
بھٹکے ہوؤں پہ کی نظر، رشکِ خضر بنا دیا
راہزنوں کی دی نِدا بن گئے شمعِ رہبری
سلجھا ہوا تھا کس قدر تیرا دماغِ حق رسی
پگھلا ہوا تھا کس قدر تیرا دل پیمبری
چشمہ تیرے بیان کا غارِ حرا کی خامُشی
نغمہ ترے سکوت کا نعرہء فتح خیبری
رمز مہ تیرے ساز کا لحنِ بلال حق نوا
صاعقہ تیرے ابر کا لرزشِ روحِ بوذری
آئینہ تیرے خُلق کا، طبعِ حسن کی سادگی
جذبہ ترے عُروج کا آلِ عبا کی برتری
جھلکیاں تیرے ناز کی جنبشِ کاکُلِ حُسین
رنگ ترے نیاز کا گردشِ چشم جعفری
شان ترے ثبات کی عزمِ شہید کربلا
شرح ترے جلال کی ضربتِ دستِ حیدری
رنگ تِرے ثباب کا جلوہء اکبر قتیل
نقش ترے شکیب کا خُونِ گلوئے اصغر
تیرا لباسِ فاخِرہ چَادرِ کُہنہء بتُول
تیری غذائے خوش مزانانِ شعیرِ حیدری
تجھ پہ نثار جان و دل، مُڑ کے ذرا یہ دیکھ لے
دیکھ رہی ہے کس طرح، ہم کو نگاہِ کافری
تیرے گدائے بے نوا، تیرے حضور آئے ہیں
چہروں پہ رنگِ خستگی، سینوں میں دردِ بے پَری
آج ہوائے دَہر سے اُن کے سروں پہ خاک ہے
رکھی تھی جن کے فرق پر تونے کلاہِ سروری
تیرے فقیر، اور دیں کوچہء کفر میں صدا
تیرے غلام اور کریں اہلِ جفا کی چاکری
طرفِ کُلہ میں جن کے تھے لعل و گُہر ٹکے ہوئے
حیف اب اُن سروں میں ہے دردِ شکستہ خاطری
جتنی بلندیاں تھیں سب ہم سے فلک نے چھین لیں
اب نہ وہ تیغِ غزنوی، اب نہ وہ تاجِ اکبری
اُٹھ کہ تیرے دَیار میں پرچمِ کفر کھُل گیا
دیر نہ کر کہ پڑگئی صحنِ حرم میں اَبتری
خیز و دلِ شکستہ را، دولتِ سوز و ساز دہ
مُسلم خستہ حال را، رُخصتِ تُر کتاز دہ
