شعاعِ رنگ ۔ عرفانہ عزیز

فرخ منظور

لائبریرین
شعاعِ رنگ
(عرفانہ عزیز)

ثنائے صبح میں ہے محو آستانِ نسیم
سنور گیا ہے گلِ تر کا سایۂ رخسار
بدل گئی ہے ترے لب میں داستانِ بہار
نکھر گئی ہے چمن میں ادائے موجِ شمیم

مہک رہی ہے پیامِ صبا سے کوئے ندیم
گلوں کو یاد ہے رعنائیِ قبائے نگار
کنارِ جاں میں فروزاں ہے تیری راہگزار
دمک رہے ہیں فضا میں گل و سمن کے حریم
شعاعِ رنگ کی آغوش میں ہے دیدۂ نم
تری تلاش میں ہیں شہرِ آرزو کے قدم
حریمِ جاں پہ ابھی اختیار ہے تیرا
کہ مہرباں ہے ابھی دشت و در پہ ابرِ کرم
اسیر تیرے ہوئے کعبۂ نظر کے صنم
تہِ نجوم ابھی انتظار ہے تیرا
٭٭٭٭٭
 
Top