شاہنامہء فردوسی میں نافہمیدنی الفاظ و جملات سے متعلق سوالات۔

سلامت باشید۔
فارسی شاعری کے بلند شاہکاروں میں سے ایک شاہنامہء فردوسی ہے۔ البتہ شاہنامہ‌خوانی کے دوران جن چیزوں کا میں فہم نہ کرسکا، اس لڑی میں مَیں برادرم حسان خان سے ان چیزوں کے متعلق سوالات کروں گا۔

 

هم آرام ازویست و هم کار ازوی
هم انجام ازویست و فرجام ازوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سپاس از جهاندارِ پیروزگر
کزویست نیرو و فر و هنر

ان دونوں ابیات میں 'از' اور 'وے' یا 'ویست' جدا واژے ہیں یا انہیں یکجا ہی تلفظ کیا جائے گا؟

 

شاہنامۂ فردوسی کے ذخیرۂ الفاظ اور دستورِ زبان میں ذرا قدامت ہے، کیونکہ وہ بہر حال ہزار سال قدیم منظومہ ہے، اِس لیے اُس کی خوانِش میں مُبتَدیوں کو مسئلہ ہو سکتا ہے۔ میں بھی کئی مقامات پر سردرگُم (اُلجھن کا شکار) رہ جاتا ہوں، اور کئی ابیات کا مفہوم دُرستی سے سمجھ نہیں آ پاتا۔ میں بھی آپ کی طرح شاہنامۂ فردوسی کا طالبِ علم ہوں۔ آپ کے جن سوالات کا جواب دینا میرے لیے ممکن ہوا، دوں گا۔

 

ازُویست = از + او + است
ازُوی = از + او(ی)
کزُویست = کہ + از + او + است

اِن تینوں کا تلفُّظ مِلا کر یکجا کیا جائے گا۔

 

کیا یہاں او کے بجائے وے نہیں ہے؟

 

اگرچہ 'وَی' اور 'اُو' مترادف ہیں، لیکن یہاں پر 'اُو(ی)' ہے۔

بیت کو یوں بھی لکھا جا سکتا ہے:
هم آرام از اُویست و هم کام از اُوی
هم انجام از اُویست و فرجام از اُوی

 

زمانه به مردم شد آراسته
و زو ارج گیرد همی خواسته
--------------

یہاں خواستہ سے مراد مطلوب و مقصود ہے یا مال و زر؟

 

ز فرمان و رایش کسی نگذرد
پی مور بی‌او زمین نسپرد
------------------------
دوسرے مصرعے کا معنی یہ ہے کہ خدا کے بدوں زمین چیونٹی کو پامال نہیں کرسکتی؟ یا خدا کے بدوں چیونٹی زمین میں نہیں جاسکتی؟

 

میرے خیال سے یہاں 'خواستہ' کا معنی مال و زر ہے، اور فردوسی مصرعِ ثانی میں کہہ رہے ہیں کہ مال و ثروت مردُم ہی کے باعث/ذریعے قدر و قیمت حاصل کرتی ہے۔

 

[خدا کے فرمان] کے بغیر چیونٹی کا پیر زمین طے نہیں کر سکتا۔