شادیاں

[قمراحمد]

شادیاں
گل نوخیز اختر​

کافی عرصہ ایک ساتھ گذارنے کے بعد ایک دن لڑکے نے لڑکی سے کہا۔۔۔۔۔ ”میرے خیال ہے اب ہمیں شادی کرلینی چاہیے!“
لڑکی نے کچھ سوچ کرکہا۔۔۔۔”وہ تو ٹھیک ہے لیکن ہم سے شادی کرے گاکون؟“

تو قبلہ قارئین صاحبب !آج کل شادیوں کا سیزن ہے۔روزانہ ڈیڑھ دوکلو نکاح ہورہے ہیں۔ عطاءالحق قاسمی مجھ سے پوچھنے لگے”تم شادی کب کررہے ہو؟“
میں نے سر جھکا کر کہا۔۔۔۔۔” جس دن حکیم صاحب نے اجازت دے دی۔۔۔۔۔“
عطاءالحق قاسمی زور سے اُچھلے۔۔۔۔۔
اِس سے پہلے کہ اُن کی یہ حیرت ’خوشی میں تبدیل ہوتی‘ میں نے اُنہیں باور کرایا کہ قبلہ حکیم صاحب میرے تایا جان ہیں اور ہمارے ہاں عموماََ شادی بیاہ کے فیصلے وہی کرتے ہیں۔

جناب !شادی کرنا بھی ایک فن ہے اور جو اِس فن میں ناکام ہو جاتا ہے وہ شادی شدہ۔۔۔۔۔ اور جو طاق ہو جاتا ہے وہ ”فنکار“ کہلاتا ہے۔میں نے میاں صاحب سے پوچھا کی شادی کس عمر میں کرنی چاہیے؟
اطمینان سے بولے۔۔۔۔۔” ساٹھ سال کی عمرمیں۔۔۔۔۔“
میں نے منہ بنایا۔۔۔۔ ”براہِ کرم اپنا فائدہ نہ سوچیں اور ٹھیک سے جواب دیں“
وہ دوبارہ بولے۔۔۔۔۔” ساٹھ سال کی عمرمیں۔۔۔۔۔“
”وجہ“؟۔۔۔۔۔میں نے پوچھا۔
مسکرا کر بولے۔۔۔۔۔اُس عمر میں انسان کو نیند بہت کم آتی ہے۔۔۔۔۔“
میں نے میاں صاحب کی بات پر غور کیاتو مجھے قائل ہونا ہی پڑاکیونکہ میں اُس خوبصورت عورت کو جانتا ہوں جو ڈاکڑ کے پاس گئی اور کہنے لگی۔۔۔۔۔”ڈاکٹر صاحب! میں ساری رات سو نہیں سکتی۔۔۔۔میری صحت بھی خراب ہوتی جارہی ہے۔۔۔۔۔براہِ کرم میرے شوہر کے لیے نیند کی کوئی اچھی سی دوائی لکھ دیں۔“

کچھ لوگ کنوارے ہوتے ہیں اور کچھ غیر شادی شدہ۔۔۔۔۔میں نے میاں صاحب سے دریافت کیاکہ ”کنوارہ اور غیرشادی شدہ”میں آخر فرق کیا ہے؟
فخر سے بولے۔۔۔۔۔”وہی جوتم میں اور مجھ میں ہے۔۔۔۔۔“

سبحان اللہ۔۔۔۔۔میاں صاحب بھی بعض اوقات ایسی مثال دیتے ہیں کی بندہ ایکس وائی زیڈ ہوجاتا ہے۔۔۔۔۔لیکن بہرحال جناب یہ بات تو طے ہے کہ کچھ موسم شادیوں کے لیے بہت موزوں ہوتے ہیں۔ہمارے ہاں سردیوں کا موسم اِس حادثے کے لیے موزوں ترین سمجھا جاتا ہے۔میرے جس جس دوست کی شادی ہوئی ہے وہ عجیب وغریب جملے بولنے لگا ہے۔اِن کی دیکھا دیکھی مجھے بھی بخار ہونے لگا ہے۔کل ایک دوست کا فون آیا۔۔۔۔۔کہنے لگا۔۔۔۔۔”نوخیز!میری شادی ہورہی ہے!“
میں نے جلدی سے کہا۔۔۔۔۔”کھال مجھے دینا“

ایک دوسرے دوست سے چھ سال بعد ملاقات ہوئی تو میں نے پوچھا۔۔۔۔”کیوں بھئی۔۔۔۔۔شادی وادی کروائی یا ابھی تک اپنے کپڑے خود ہی دھورہے ہو؟“
ایک زور دار آہ بھر کربولا۔۔۔۔۔”تمہاری دونوں باتوں کا جواب ۔۔۔۔۔ہاں ہے“۔

نوٹ:- "گل نوخیز اختر" کا یہ مزاحیہ اور طنزیہ کالم "قمراحمد" نےاُردو محفل کے دوستوں کے لیے خصوصی طور پر ٹائپ کیا۔
خوش رہیں، مسکراتے رہیں۔ آمین