فراز سلامتی کونسل

[حسان خان]

پھر چلے ہیں مرے زخموں کا مداوا کرنے​

میرے غمخوار اُسی فتنہ گرِ دہر کے پاس​

جس کی دہلیز پہ ٹپکی ہیں لہو کی بوندیں​

جب بھی پہنچا ہے کوئی سوختہ جاں کشتۂ یاس​

جس کے ایوانِ عدالت میں فروکش قاتل​

بزم آرا و سخن گستر و فرخندہ لباس​

ہر گھڑی نعرہ زناں 'امن و مساوات کی خیر'​

زر کی میزان میں رکھے ہوئے انسان کا ماس​

​

کون اس قتل گہِ ناز کے سمجھے اسرار​

جس نے ہر دشنے کو پھولوں میں چھپا رکھا ہے​

امن کی فاختہ اڑتی ہے نشاں پر لیکن​

نسلِ انساں کو صلیبوں پہ چڑھا رکھا ہے​

اس طرف نطق کی بارانِ کرم اور ادھر​

کاسۂ سر سے مناروں کو سجا رکھا ہے​

​

جب بھی آیا ہے کوئی کشتۂ بیداد اُسے​

مرہمِ وعدۂ فردا کے سوا کچھ نہ ملا​

یہاں قاتل کے طرفدار ہیں سارے قاتل​

کاہشِ دیدۂ پرخوں کا صلہ کچھ نہ ملا​

کاشمر کوریا ویت نام دومنکن کانگو​

کسی بسمل کو بجز حرفِ دعا کچھ نہ ملا​

​

قصرِ انصاف کی زنجیر ہلانے والو​

کجکلاہوں پہ قیامت کا نشہ ہے طاری​

اپنی شمشیر پہ کشکول کو ترجیح نہ دو​

دم ہو بازو میں تو ہر ضربِ جنوں ہے کاری​

اس جزیرے میں کہیں نور کا مینار نہیں​

جس کے اطراف میں اک قلزمِ خوں ہے جاری​

"جوہرِ جامِ جم از کانِ جہانِ دگر است​

تُو توقع ز گلِ کوزہ گراں می داری"​

​

(احمد فراز)​

 

[فرخ منظور]

کاش احمد فراز عشقیہ غزلیات کو چھوڑ کر صرف "نظم" لکھنے پر ہی توجہ دیتے۔