جگر سب ان پہ ہیں تصدق وہ سامنے تو آئیں - جگر مراد آبادی

[کاشفی]

غزل​

(جگر مُراد آبادی)​

​

سب ان پہ ہیں تصدق وہ سامنے تو آئیں​

اشکوں کی آرزوئیں آنکھوں کی التجائیں​

​

اُس سے بھی شوخ تر ہیں اس شوخ کی ادائیں​

کر جائیں کام اپنا لیکن نظر نہ ائیں​

​

اس حسن برق وش کے دل سوختہ وہی ہیں​

شعلوں سے بھی جو کھیلیں دامن کو بھی بچائیں​

​

آلودہ خاک ہی میں رہنے دو اس کو ناصح​

دامن اگر جھٹک دوں جلوے کہاں سمائیں​

​

بیتابیء محبت وجہ سکونِ غم ہے​

آغوش مضطرب میں خوابیدہ ہیں بلائیں​

​

اشعار بن کے نکلیں جو سینہء جگر سے​

سب حسن یار کی تھیں بیساختہ ادائیں​

 

[محمد وارث]

واہ واہ واہ، کیا خوبصورت غزل ہے۔

بہت شکریہ کاشفی صاحب شیئر کرنے کیلیے۔

 

[کاشفی]

شکریہ محمد وارث صاحب!