نغمہ ٔروح​
اِستمداد از حضرت سلطانِ بغداد رضی اللہ تعالیٰ عنہ​
اے کریم بنِ کریم اے رہنما اے مقتدا​
اخترِ برجِ سخاوت گوہرِ درجِ عطا​
آستانے پہ ترے حاضر ہے یہ تیرا گدا​
لاج رکھ لے دست و دامن کی مرے بہرِ خدا​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
شاہِ اقلیمِ ولایت سرورِ کیواں جناب​
ہے تمہارے آستانے کی زمیں گردوں قباب​
حسرتِ دل کی کشاکش سے ہیں لاکھوں اضطراب​
التجا مقبول کیجے اپنے سائل کی شتاب​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
سالکِ راہِ خدا کو راہنما ہے تیری ذات​
مسلکِ عرفانِ حق ہے پیشوا ہے تیری ذات​
بے نوایانِ جہاں کا آسرا ہے تیری ذات​
تشنہ کاموں کے لیے بحر عطا ہے تیری ذات​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ہر طرف سے فوجِ غم کی ہے چڑھائی الغیاث​
کرتی ہے پامال یہ بے دست و پائی الغیاث​
پھر گئی ہے شکل قسمت سب خدائی الغیاث​
اے مرے فریادرس تیری دہائی الغیاث​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
منکشف کس پر نہیں شانِ معلی کا عروج​
آفتابِ حق نما ہو تم کو ہے زیبا عروج​
میں حضیضِ غم میں ہوں اِمداد ہو شاہا عروج​
ہر ترقی پر ترقی ہو بڑھے دونا عروج​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
تا کجا ہو پائمالِ لشکرِ اَفکارِ روح​
تابکے ترساں رہے بے مونس و غمخوار روح​
ہو چلی ہے کاوشِ غم سے نہایت زار روح​
طالبِ اِمداد ہے ہر وقت اے دلدار روح​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
دبدبہ میں ہے فلک شوکت ترا اے ماہِ کاخ​
دیکھتے ہیں ٹوپیاں تھامے گدا و شاہ کاخ​
قصر جنت سے فزوں رکھتا ہے عزو و جاہ کاخ​
اب دکھا دے دیدۂ مشتاق کو للہ کاخ​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
توبہ سائل اور تیرے در سے پلٹے نامراد​
ہم نے کیا دیکھے نہیں غمگین آتے جاتے شاد​
آستانے کے گدا ہیں قیصر و کسریٰ قباد​
ہو کبھی لطف و کرم سے بندۂ مضطر بھی یاد​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
نفس امارہ کے پھندے میں پھنسا ہوں العیاذ​
در ترا بیکس پنہ کوچہ ترا عالم ملاذ​
رحم فرما یا ملاذی لطف فرما یا ملاذ​
حاضرِ در ہے غلامِ آستاں بہرِ لواذ​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
شہرِ یار اے ذی وقار اے باغِ عالم کی بہار​
بحر احساں رشخۂ نیسانِ جودِ کردگار​
ہوں خزانِ غم کے ہاتھوں پائمالی سے دوچار​
عرض کرتا ہوں ترے در پر بچشمِ اشکبار​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
برسرِ پرخاش ہے مجھ سے عدوے بے تمیز​
رات دن ہے در پئے قلبِ حزیں نفسِ رجیز​
مبتلا ہے سو بلائوں میں مری جانِ عزیز​
حلِ مشکل آپ کے آگے نہیں دشوار چیز​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
اک جہاں سیرابِ اَبرِ فیض ہے اب کی برس​
تر نوا ہیں بلبلیں پڑتا ہے گوشِ گل میں رس​
ہے یہاں کشتِ تمنا خشک و زندانِ قفس​
اے سحابِ رحمتِ حق سوکھے دھانوں پر برس​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
فصلِ گل آئی عروسانِ چمن ہیں سبز پوش​
شادمانی کا نواںسنجانِ گلشن میں ہے جوش​
جوبنوں پر آ گیا حسنِ بہارِ گل فروش​
ہائے یہ رنگ اور ہیں یوں دام میں گم کردہ ہوش​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
دیکھ کر اس نفسِ بد خصلت کے یہ زشتی خواص​
سوزِ غم سے دل پگھلتا ہے مرا شکلِ رصاص​
کس سے مانگوں خونِ حسرت ہاے کشتہ کا قصاص​
مجھ کو اس موذی کے چنگل سے عطا کیجے خلاص​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ایک تو ناخن بدل ہے شدتِ افکار قرض​
اس پر اَعدا نے نشانہ کر لیا ہے مجھ کو فرض​
فرض اَدا ہو یا نہ ہو لیکن مرا آزار فرض​
رد نہ فرمائو خدا کے واسطے سائل کی عرض​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
نفس شیطاں میں بڑھے ہیں سو طرح کے اختلاط​
ہر قدم در پیش ہے مجھ کو طریقِ پل صراط​
بھولی بھولی سے کبھی یاد آتی ہے شکل نشاط​
پیش بارِ کوہِ کاہِ ناتواں کی کیا بساط​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
آفتوں میں پھنس گیا ہے بندۂ دارالحفیظ​
جان سے سو کاہشوں میں دم ہے مضطر الحفیظ​
ایک قلبِ ناتواں ہے لاکھ نشتر الحفیظ​
المدد اے داد رس اے بندہ پرور الحفیظ​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
صبح صادق کا کنارِ آسماں سے ہے طلوع​
ڈھل چکا ہے صورتِ شب حسنِ رخسارِ شموع​
طائروں نے آشیانوں میں کیے نغمے شروع​
اور نہیں آنکھوں کو اب تک خوابِ غفلت سے رجوع​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
بدلیاں چھائیں ہوا بدلی ہوئے شاداب باغ​
غنچے چٹکے پھول مہکے بس گیا دل کا دماغ​
آہ اے جورِ قفس دل ہے کہ محرومی کا داغ​
واہ اے لطفِ صبا گل ہے تمنا کا چراغ​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
آسماں ہے قوس فکریں تیر میرا دل ہدف​
نفس و شیطاں ہر گھڑی کف برلب و خنجر بکف​
منتظر ہوں میں کہ اب آئی صداے لا تخف​
سرورِ دیں کا تصدق بحر سلطانِ نجف​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
بڑھ چلا ہے آج کل اَحباب میں جوشِ نفاق​
خوش مذاقانِ زمانہ ہو چلے ہیں بد مذاق​
سیکڑوں پردوں میں پوشیدہ ہے حسنِ اتفاق​
برسر پیکار ہیں آگے جو تھے اہلِ وفاق​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ڈر درندوں کا اندھیری رات صحرا ہولناک​
راہ نامعلوم رعشہ پائوں میں لاکھوں مغاک​
دیکھ کر ابرِ سیہ کو دل ہوا جاتا ہے چاک​
آئیے اِمداد کو ورنہ میں ہوتا ہوں ہلاک​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ایک عالم پر نہیں رہتا کبھی عالم کا حال​
ہر کمالے را زوال و ہر زوالے را کمال​
بڑھ چکیں شب ہاے فرقت اب تو ہو روزِ وصال​
مہرادھرمنہ کر کہ میرے دن پھریں دل ہو نہال​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
گو چڑھائی کر رہے ہیں مجھ پہ اندوہ و اَلم​
گو پیاپے ہو رہے ہیں اہلِ عالم کے ستم​
پر کہیں چھٹتا ہے تیرا آستاں تیرے قدم​
چارۂ دردِ دلِ مضطر کریں تیرے کرم​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ہر کمر بستہ عداوت پر بہت اہلِ زمن​
ایک جانِ ناتواں لاکھوں الم لاکھوں محن​
سن لے فریادِ حسن فرما دے اِمدادِ حسن​
صبحِ محشر تک رہے آباد تیری انجمن​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
ہے ترے الطاف کا چرچا جہاں میں چار سو​
شہرۂ آفاق ہیں یہ خصلتیں یہ نیک خو​
ہے گدا کا حال تجھ پر آشکارا مو بمو​
آجکل گھیرے ہوئے ہیں چار جانب سے عدو​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
شام ہے نزدیک منزل دور میں گم کردہ راہ​
ہر قدم پر پڑتے ہیں اس دشت میں خس پوش جاہ​
کوئی ساتھی ہے نہ رہبر جس سے حاصل ہو پناہ​
اشک آنکھوں میں قلق دل میں لبوں پر آہ آہ​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
تاج والوں کو مبارک تاجِ زر تختِ شہی​
بادشا لاکھوں ہوئے کس پر پھلی کس کی رہی​
میں گدا ٹھہروں ترا میری اسی میں ہے بہی​
ظلِ دامن خاک در دیہیم و افسر ہے یہی​
روے رحمت برمتاب اے کامِ جاں از روے من​
حرمتِ روحِ پیمبر یک نظر کن سوے من​
 
مناقب حضرت شاہ بدیع الدین مدار قدس سرہ الشریف​
ہوا ہوں دادِ ستم کو میں حاضرِ دربار​
گواہ ہیں دلِ محزون و چشمِ دریا بار​
طرح طرح سے ستاتا ہے زمرۂ اشرار​
بدیع بہر خدا حرمتِ شہِ ابرار​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
اِدھر اقارب عقارب عدو اجانب و خویش​
اِدھر ہوں جوشِ معاصی کے ہاتھ سے دل ریش​
بیاں میں کس سے کروں ہیں جو آفتیں در پیش​
پھنسا ہے سخت بلائوں میں یہ عقیدت کیش​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
نہ ہوں میں طالبِ افسر نہ سائل دیہیم​
کہ سنگ منزلِ مقصد ہے خواہش زر و سیم​
کیا ہے تم کو خدا نے کریم ابنِ کریم​
فقط یہی ہے شہا آرزوے عبد اثیم​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
ہوا ہے خنجر افکار سے جگر گھائل​
نفس نفس ہے عیاں دم شماریِ بسمل​
مجھے ہو مرحمت اب داروے جراحتِ دل​
نہ خالی ہاتھ پھرے آستاں سے یہ سائل​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
تمہارے وصف و ثنا کس طرح سے ہوں مرقوم​
کہ شانِ ارفع و اعلیٰ کسے نہیں معلوم​
ہے زیرِ تیغِ الم مجھ غریب کا حلقوم​
ہوئی ہے دل کی طرف یورشِ سپاہِ ہموم​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
ہوا ہے بندہ گرفتار پنجۂ صیاد​
ہیں ہر گھڑی ستم ایجاد سے ستم ایجاد​
حضور پڑتی ہے ہر روز اک نئی اُفتاد​
تمہارے دَر پہ میں لایا ہوں جور کی فریاد​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
تمام ذرّوں پہ کالشمس ہیں یہ جود و نوال​
فقیر خستہ جگر کا بھی رد نہ کیجے سوال​
حسنؔ ہوں نام کو پر ہوں میں سخت بد افعال​
عطا ہو مجھ کو بھی اے شاہ جنسِ حسنِ مآل​
مدار چشمِ عنایت زمن دریغ مدار​
نگاہِ لطف و کرم از حسنؔ دریغ مدار​
 
عرضِ سلام​
بدرگاہ خیرالانام علیہ الصلوٰۃوالسلام​
السلام اے خسروِ دنیا و دیں​
السلام اے راحتِ جانِ حزیں​
السلام اے بادشاہِ دو جہاں​
السلام اے سرورِ کون و مکاں​
السلام اے نورِ ایماں السلام​
السلام اے راحتِ جاں السلام​
اے شکیبِ جانِ مضطر السلام​
آفتاب ذرّہ پرور السلام​
درد و غم کے چارہ فرما السلام​
درد مندوں کے مسیحا السلام​
اے مرادیں دینے والے السلام​
دونوں عالم کے اُجالے السلام​
درد و غم میں مبتلا ہے یہ غریب​
دم چلا تیری دُہائی اے طبیب​
نبضیں ساقط رُوح مضطرجی نڈھال​
دردِ عصیاں سے ہوا ہے غیر حال​
بے سہاروں کے سہارے ہیں حضور​
حامی و یاور ہمارے ہیں حضور​
ہم غریبوں پر کرم فرمائیے​
بد نصیبوں پر کرم فرمائیے​
بے قراروں کے سرھانے آئیے​
دل فگاروں کے سرھانے آئیے​
جاں بلب کی چارہ فرمائی کرو​
جانِ عیسیٰ ہو مسیحائی کرو​
شام ہے نزدیک، منزل دُور ہے​
پائوں کیسے جان تک رنجور ہے​
مغربی گوشوں میں پھوٹی ہے شفق​
زردیِ خورشید سے ہے رنگ فق​
راہ نامعلوم صحرا پُر خطر​
کوئی ساتھی ہے نہ کوئی راہبر​
طائروں نے بھی بسیرا لے لیا​
خواہش پرواز کو رُخصت کیا​
ہر طرف کرتا ہوں حیرت سے نگاہ​
پر نہیں ملتی کسی صورت سے راہ​
سو بلائیں چشمِ تر کے سامنے​
یاس کی صورت نظر کے سامنے​
دل پریشاں بات گھبرائی ہوئی​
شکل پر اَفسردگی چھائی ہوئی​
ظلمتیں شب کی غضب ڈھانے لگیں​
کالی کالی بدلیاں چھانے لگیں​
ان بلائوں میں پھنسا ہے خانہ زاد​
آفتوں میں مبتلا ہے خانہ زاد​
اے عرب کے چاند اے مہر عجم​
اے خدا کے نور اے شمع حرم​
فرش کی زینت ہے دم سے آپ کے​
عرش کی عزت قدم سے آپ کے​
آپ سے ہے جلوئہ حق کا ظہور​
آپ ہی ہیں نور کی آنکھوں کے نور​
آپ سے روشن ہوئے کون و مکاں​
آپ سے پُر نور ہے بزمِ جہاں​
اے خداوندِ عرب شاہِ عجم​
کیجیے ہندی غلاموں پر کرم​
ہم سیہ کاروں پہ رحمت کیجیے​
تیرہ بختوں کی شفاعت کیجیے​
اپنے بندوں کی مدد فرمایئے​
پیارے حامی مسکراتے آیئے​
ہو اگر شانِ تبسم کا کرم​
صبح ہو جائے شبِ دیجورِ غم​
ظلمتوں میں گم ہوا ہے راستہ​
المدد اے خندئہ دنداں نما​
ہاں دکھا جانا تجلی کی اَدا​
ٹھوکریں کھاتا ہے پردیسی ترا​
دیکھیے کب تک چمکتے ہیں نصیب​
دیر سے ہے لو لگائے یہ غریب​
ملتجی ہوں میں عرب کے چاند سے​
اپنے ربّ سے اپنے ربّ کے چاند سے​
میں بھکاری ہوں تمہارا تم غنی​
لاج رکھ لو میرے پھیلے ہاتھ کی​
تنگ آیا ہو دلِ ناکام سے​
اِس نکمّے کو لگا دو کام سے​
آپ کا دربار ہے عرش اِشتباہ​
آپ کی سرکار ہے بے کس پناہ​
مانگتے پھرتے ہیں سلطان و امیر​
رات دن پھیری لگاتے ہیں فقیر​
غم زدوں کو آپ کر دیتے ہیں شاد​
سب کو مل جاتی ہے منہ مانگی مراد​
میں تمہارا ہوں گداے بے نوا​
کیجے اپنے بے نوائوں پر عطا​
میں غلام ہیچ کارہ ہوں حضور​
ہیچ کاروں پر کرم ہے پَر ضرور​
اچھے اچھوں کے ہیں گاہک ہر کہیں​
ہم بدوں کی ہے خریداری یہیں​
کیجیے رحمت حسنؔ پر کیجیے​
دونوں عالم کی مرادیں دیجیے​
 
[رباعیات]​
جانِ گلزارِ مصطفائی تم ہو​
مختار ہو مالکِ خدائی تم ہو​
جلوہ سے تمہارے ہے عیاں شانِ خدا​
آئینۂ ذاتِ کبریائی تم ہو​
- : دیگر :-​
یارانِ نبی کا وصف کس سے ہو اَدا​
ایک ایک ہے ان میں ناظمِ نظمِ ہدیٰ​
پائے کوئی کیوں کر اس رُباعی کا جواب​
اے اہلِ سخن جس کا مصنف ہو خدا​
- : دیگر :-​
بدکار ہیں عاصی ہیں زیاں کار ہیں ہم​
تعزیر کے بے شبہ سزاوار ہیں ہم​
یہ سب سہی پر دل کو ہے اس سے قوت​
اللہ کریم ہے گنہگار ہیں ہم​
- : دیگر :-​
خاطی ہوں سیاہ رُو ہوں خطاکار ہوں میں​
جو کچھ ہو حسنؔ سب کا سزاوار ہوں میں​
پر اُس کے کرم پر ہے بھروسہ بھاری​
اللہ ہے شاہد کہ گنہگار ہوں میں​
- : دیگر :-​
اس درجہ ہے ضعف جاں گزاے اسلام​
ہیں جس سے ضعیف سب قواے اسلام​
اے مرتوں کی جان کو بچانے والے​
اب ہے ترے ہاتھ میں دواے اسلام​
- : دیگر :-​
کب تک یہ مصیبتیں اُٹھائے اسلام​
کب تک رہے ضعف جاں گزاے اِسلام​
پھر از سرِ نو اِس کو توانا کر دے​
اے حامیِ اسلام خداے اسلام​
- : دیگر :-​
ہے شام قریب چھپی جاتی ہے ضو​
منزل ہے بعید تھک گیا رہرو​
اب تیری طرف شکستہ حالوں کے رفیق​
ٹوٹی ہوئی آس نے لگائی ہے لو​
- : دیگر :-​
برسائے وہ آزادہ روی نے جھالے​
ہر راہ میں بہہ رہے ہیں ندی نالے​
اسلام کے بیٹرے کو سہارا دینا​
اے ڈوبتوں کے پار لگانے والے​
- : دیگر :-​
سن احقر افرادِ زمن کی فریاد​
سن بندۂ پابندِ محن کی فریاد​
یا رب تجھے واسطہ خداوندی کا​
رہ جائے نہ بے اَثر حسنؔ کی فریاد​
- : دیگر :-​
جو لوگ خدا کی ہیں عبادت کرتے​
کیوں اہلِ خطا کی ہیں حقارت کرتے​
بندے جو گنہگار ہیں وہ کس کے ہیں​
کچھ دیر اُسے ہوتی ہے رحمت کرتے​
- : دیگر :-​
دنیا فانی ہے اہلِ دنیا فانی​
شہر و بازار و کوہ و صحرا فانی​
دل شاد کریں کس کے نظارہ سے حسنؔ​
آنکھیں فانی ہیں یہ تماشا فانی​
- : دیگر :-​
اس گھر میں نہ پابند نہ آزاد رہے​
غمگین رہے کوئی نہ دل شاد رہے​
تعمیر مکاں کس کے لیے ہوتا ہے​
کوئی نہ رہے گا یہاں یہ یاد رہے​
 
[اشعار متفرقات]​
یہ رحمت ہے کہ بے تابانہ آئیں گے قیامت میں​
جو غل پہنچا گرفتارانِ اُمت کے سلاسل کا​
- : دیگر :-​
ہے جمالِ حق نما بارہ اماموں کا جمال​
اس مبارک سال میں ہے ہر مہینہ نور کا​
- : دیگر :-​
ملک ہفت آسماں کے جبہ سا ہیں​
تعالی اللہ یہ رُتبہ آستاں کا​
ابھی روشن ہوں میرے دل کی آنکھیں​
جو سُرمہ ہو غبارِ آستاں کا​
حسنؔ ہم کو نہیں خوفِ معاصی​
سہارا ہے شفیعِ عاصیاں کا​
- : دیگر :-​
خوف محشر سے ہے فارغ دلِ مضطر اپنا​
کہ ہے محبوبِ خدا شافعِ محشر اپنا​
- : دیگر :-​
داغ دل یادِ دہانِ شہ میں مرجھا ئیں گے کیا​
جن کو دیں کوثر سے پانی گل وہ کمھلائیں گے کیا​
جس قدم کا عرش پامالِ خرامِ ناز ہو​
اُس کے نیچے موم یہ پتھر نہ ہو جائیں گے کیا​
جن کی پیاری اُنگلیوں سے نور کے چشمے بہے​
اُن سے عصیاں کے سیہ نامے نہ دُھل جائیں گے کیا​
کوثر و تسنیم کس کے ہیں ہمارے شاہ کے​
حشر کے دن پھر ہمیں پیاسے بھی رہ جائیں گے کیا​
- : دیگر :-​
کیا بیاں ہو عز و شانِ اہلِ بیت​
کبریا ہے مدح خوانِ اہلِ بیت​
- : دیگر :-​
لاش میری ہو پڑی یا رب میانِ کوے دوست​
پڑتی ہو اُڑ اُڑ کے گرد رہروانِ کوے دوست​
- : دیگر :-​
مولیٰ دکھا دو جلوۂ دیدار الغیاث​
بے چین ہے بہت دلِ بیمار الغیاث​
- : دیگر :-​
کیا خوف ہو خورشیدِ قیامت کی تپش کا​
کافی ہے ہمیں سایۂ دامانِ محمد​
ہوتے ہیں فدا مہر و قمر حسنِ بیاں پر​
پڑھتا ہوں جو مدحِ رُخِ تابانِ محمد​
- : دیگر :-​
رنگ چمن آرائی اُڑانے کی ہوا میں​
چلتی ہے صبا دامن مولیٰ سے لپٹ کر​
- : دیگر :-​
رو رہا ہوں یادِ دندانِ شہِ تسنیم میں​
عین دریا میں ہے مجھ کو آبِ گوہر کی تلاش​
سایۂ نخل مدینہ ہو زمین طیبہ ہو​
تخت زرّیں کی مجھے خواہش نہ اَفسر کی تلاش​
چھوڑ کر خاکِ قدم اکسیر کی خواہش کرے​
خاک میں مل جائے یا رب کیمیا گر کی تلاش​
ان لبوں کی یاد میں دل کو فدا کیجے حسنؔ​
لعل پتھر ہیں کریں ہم خاک پتھر کی تلاش​
- : دیگر :-​
ہے شادیِ تجلّیِ جاناں مآلِ عشق​
کیوں کر نہ ہو خوشی سے گوارا ملالِ عشق​
لا پھول ساقیا کہ گل داغ کھل گئے​
آئی ہے جوبنوں پہ بہارِ جمالِ عشق​
جس کو یہ سرفراز کرے دار ہو نصیب​
کیا کیا بیان کیجیے اَوج و کمالِ عشق​
مدہوشیوںکے لطف اُٹھاؤں میں اے حسنؔ​
دل پر مرے گرے کہیں برقِ جمالِ عشق​
- : دیگر :-​
شمس العظما امام اعظم​
بدر الفقہا امام اعظم​
مقبولِ جنابِ مُصطفائی​
محبوبِ خدا امام اعظم​
چالیس برس نہ سوئے شب بھر​
تاج العرفا امام اعظم​
گمراہ ہوں کس طرح مقلد​
ہیں راہ نما امام اعظم​
- : دیگر :-​
کیا کہوں کیا ہیں مرے پیارے نبی کی آنکھیں​
دیکھیں اُن آنکھوں نے نورِ اَزلی کی آنکھیں​
نیم وا غنچۂ اَسرارِ الٰہی کہیے​
یا یہ ہیں نرگس باغِ اَزلی کی آنکھیں​
دُھل گئی ظلمتِ اعمال پڑی جس پہ نظر​
عین رحمت ہیں شہِ مطلبی کی آنکھیں​
چشم بد دُور عجب آنکھ ہے ماشاء اللہ​
ہم نے دیکھیں نہ سنیں ایسی کسی کی آنکھیں​
- : دیگر :-​
کس کا جلوہ نظر آیا مجھ کو​
آپ میں دل نے نہ پایا مجھ کو​
لب و حسنِ نمکیں کے آگے​
نمک و قند نہ بھایا مجھ کو​
اے مرے ابرِ کرم ایک نظر​
آتش غم نے جلایا مجھ کو​
جب اُٹھا پردۂ غفلت دل سے​
ہر جگہ تو نظر آیا مجھ کو​
پردہ کھل جائے گا محشر میں مرا​
گر نہ دامن میں چھپایا مجھ کو​
کیوں کھلی رہتی ہے چشمِ مشتاق​
کون ایسا نظر آیا مجھ کو​
کیا کہوں کیسی وہ صورت تھی حسنؔ​
جس نے دیوانہ بنایا مجھ کو​
- : دیگر :-​
گلو! دیکھو ہمارے گل کی نکہت ہو اور ایسی ہو​
قمر میری نظر سے دیکھ طلعت ہو اور ایسی ہو​
شہا نامِ خدا تیرا تو کیا کہنا کہ خالق کو​
ترے پیرو بھی پیارے ہیں محبت ہو اور ایسی ہو​
- : دیگر :-​
یا رب وہ دل دے جس میں کسی کی وِلا نہ ہو​
غیر خدا نہ ہو ، کوئی جز مصطفیٰ نہ ہو​
صورت بنائی حق نے تری اپنے ہاتھ سے​
پیارے ترا نظیر نہ پیدا ہوا نہ ہو​
اے بوالہوس نصیب تجھے کیمیا کہاں​
جب تک تو خاک پاے حبیبِ خدا نہ ہو​
یا ربّ وہ نخل سبز رہے جس کی شاخ میں​
جز داغِ عشق اور کوئی گل کھلا نہ ہو​
- : دیگر :-​
معاذ اللہ اُس دل کو عذابِ حشر کا غم ہو​
کہ جس کا حامی و یاور جنابِ غوث اعظم ہو​
لبِ جاں بخش نے دی جانِ تازہ دین و ایماں کو​
محی الدیں نہ کیوں کر پھر تمہارا اسم اعظم ہو​
جِلا دیتے ہو مردوں کو دلِ مردہ جلا دیجے​
تم اِس اُمت میں شاہا یادگارِ ابنِ مریم ہو​
- : دیگر :-​
اصحابِ پاک میں ہے شمارِ معاویہ​
کیوں کر بیاں ہو عز و وقارِ معاویہ​
- : دیگر :-​
آپ ہیں ختم رُسل ختم رسالت مہر ہے​
آپ آئینہ ہیں وہ تصویرِ پشت آئینہ​
گر رسالت کی گواہی چاہتے ختم رسل​
بول اُٹھتا طوطیِ تصویر پشت آئینہ​
- : دیگر :-​
غبار بے کساں کو کوئی پہنچا دے مدینہ تک​
لپٹتا ہے ہر اک دامن سے سب کے پاؤں پڑتا ہے​
- : دیگر :-​
فانی فانی ہستی فانی​
باقی باقی باقی فانی​
ہستی کی پھر ہستی کیا ہو​
ٹھہری جب یہ فنا بھی فانی​
نفسِ کافر ناز ہے کس پر​
ہے سب رام کہانی فانی​
میرا تیرا کب تک پیارے​
میں بھی فانی تو بھی فانی​
طعمۂ خاک ہیں شاہ و گدا سب​
تخت و تاج و گدائی فانی​
نیست ہیں یہ سب مجنوں عاقل​
صحرا فانی بستی فانی​
دیکھ لے حالِ حباب و شرر کو​
دم میں ہو گئی ہستی فانی​
ایک بقا ہے ذاتِ خدا کو​
باقی ساری خدائی فانی​
قولِ حسنؔ سن قولِ حسن ہے​
باقی باقی فانی فانی​
 
تاریخ طبع، نتیجہ فکرعرش پیما علی جناب اعلیٰ حضرت مجدد مائۃ حاضرہ​
قبلہ وکعبہ مولانا مولوی حاجی محمد احمد رضاصاحب قادری برکاتی ص​
قوتِ بازوے من سنیِ نجدی فگن​
حاج و زائر حسنؔ سلمہ ذوالمِنن​
نعت چہ رنگیں نوشت شعر خوش آئیں نوشت​
شعر مگو دیں نوشت دور ز ہر ریب و ظن​
شرع ز شعرش عیاں عرش بہ بیتش نہاں​
سنّیہ را حرزِ جاں نجدیہ را سر شکن​
قلقل ایں تازہ جوش بادہ بہ ہنگام نوش​
نور فشاند بگوش شہد چکاں در دہن​
کلک رضا سالِ طبع گفت بہ افضالِ طبع​
ز انکہ ز اقوالِ طبع کلک بود نغمہ زن​
اوج بہیں محمدت جلوہ گہِ مرحمت​
۲۶ھ ۱۳​
عافیت عاقبت باد نواے حسن​
۲۶ھ ۱۳​
بادِ نواے حسن بابِ رضاے حسن​
۲۶ھ ۱۳​
بابِ رضاے حسن باز بہ جلب منن​
۲۶ھ ۱۳​
باز بہ جلب منن بازوِ بخت قوی​
۲۶ھ ۱۳​
بازوِ بخت قوی نیک حجابِ محن​
۲۶ھ ۱۳​
نیک حجاب محن فضل عفو و نبی​
۲۶ھ ۱۳​
فضل عفو و نبی حبل وی و حبل من​
۲۶ھ ۱۳​
- : ولہٗ زید مجدہٗ :-​
نعت حسن آمدہ نعت حسن​
۱۳۲۶ھ​
حُسنِ رضا باد بزیں سلام​
۱۳۲۶ھ​
اِنَّ مَنَ الذَّوقِ لَسِحْر ہمہ​
۱۳۲۶ھ​
اِنَّ مَنَ الشِّعْرِ لَحِکْمَۃ تمام​
۱۳۲۶ھ​
کلک رضا داد چناں سال آں​
یافت قبول از شدِ رأس الانام​
۱۳۲۶ھ​
ؤ​
[تواریخ از تصنیف مصنف]​
تاریخ مثنوی شفاعت و نجات​
مصنفہ مولانا مولوی محمد محسن صاحب کاکوروی وکیل مین پوری​
حسنؔ اپنے محسنؔ کی ہو کچھ ثنا​
جو احسان حسنِ طبیعت کا ہو​
شفاعت کا لکھا ہے اَحوال خوب​
بیاں کیوں کر اِس کی فصاحت کا ہو​
دعائیہ تاریخ میں نے کہی​
’یہ اچھا ذریعہ شفاعت کا ہو‘​
1893ء​
ؤ​
تاریخ وصال حضرت سیدنا و مولانا شاہ آل رسول رضی اللہ تعالی عنہ و نوراللہ مرقدہ​
جب آلِ رسول بحر عرفاں​
رونق دہِ خاندانِ برکات​
وہ واقفِ رمز لَا و اِلَّا​
وہ کاشفِ سر نفی و اِثبات​
عازم ہوئے سوے دارِ عقبیٰ​
اِس غم کی گھٹا سے دن ہوا رات​
رضوان نے کہی حسنؔ سے تاریخ​
’اب خلد میں دیکھیے کرامات‘​
۶۳۴ + ۶۶۲۔۔۔ ۱۲۹۶ھ​
- : دیگر :-​
اچھے کے پیارے میرے سہارے​
باہر بیاں سے اُن کے مناقب​
وہ اور شریعت وہ اور طریقت​
دو دل یک ارماں یک جاں دو قالب​
عبد و خدا میں مانند برزخ​
مقصود و قاصد مطلوب و طالب​
دریاے رحمت گلزارِ رافت​
جانِ مراحم کانِ مواہب​
نجم منازل شمع محافل​
مہر مشارق ماہِ مغارب​
خلق خدا کے کیوں نہ ہوں رہبر​
ہیں مصطفیٰ کے فرزند و نائب​
ہے اُن کے دم سے عزت کی عزت​
تاجِ مراتب راسِ مناصب​
جب اُس قمر نے لی راہِ جنت​
تھی اشک افشاں چشم کواکب​
میں نے کہی یہ تاریخ رحلت​
’قطب المشائخ اصل مطالب‘​
1296ھ​
ؤ​
تاریخ طبع و تالیف رسالہ نگارستانِ لطافت، مصنفہ خود​
ہو گیا ختم یہ رسالہ آج​
شکر خالق کریں نہ کیوں کر ہم​
سن تالیف اے حسنؔ سن لے​
’منبع وصف شہریارِ حرم‘​
1302ھ​
- : دیگر :-​
یہ چند ورق نعت کے لایا ہے غلام آج​
اِنعام کچھ اس کا مجھے اے بحر سخا دو​
میں کیا کہوں میری ہے یہ حسرت یہ تمنا​
میں کیا کہوں مجھ کو یہ صلہ دو یہ صلہ دو​
تم آپ مرے دل کی مرادوں سے ہو واقف​
خیرات کچھ اپنی مجھے اے بحر عطا دو​
ہیں یہ سن تالیف فقیرانہ صدا میں​
’والی میں تصدق مجھے مدحت کی جزا دو‘​
1302ھ​
ؤ​
تاریخ طبع دیوان حضور احمدرضاخان آثمؔ بریلوی​
ہے یہ دیوان اُس کی مدحت میں​
جس کی ہر بات ہے خدا کو قبول​
جس کے قبضہ میں دو جہان کا ملک​
جس کے بندوں میں تاجدار شمول​
جس پہ قرباں جناں جناں کے چمن​
جس پہ پیارا خدا خدا کے رسول​
جس کے صدقے میں اہل ایماں پر​
ہر گھڑی رحمتِ خدا کا نزول​
جس کی سرکار قاضیِ حاجات​
جس کا دربار معطیِ مامول​
یہ ضیائیں اُسی کے دم کی ہیں​
یہ سخائیں اُسی کی ہیں معمول​
دن کو ملتا ہے روشنی کا چراغ​
شب کو کھلتا ہے چاندنی کا پھول​
اُس کے دَر سے ملے گدا کو بھیک​
اُس کے گھر سے ملے دُعا کو قبول​
اے حسنؔ کیا حسن ہے مصرعِ سال​
’باغ اسلام کے کھلے کیا پھول‘​
۰۴ھ ۱۳​
ؤ​
قطعہ تاریخ وصال اعلیٰ حضرت عظیم البرکۃ سیدی و ملجائی مرشدی و مولائی​
عالیجناب مولانا مولوی سید شاہ ابوالحسین احمد نوری میاں صاحب ص​
شیخ زمانہ حضرت سید ابوالحسینؔ​
جانِ مراد کانِ ہدیٰ شانِ اہتدا​
نورِ نگاہ حضرتِ آلِ رسول کے​
اچھے میاںؔ کے لختِ جگر آنکھوں کی ضیا​
خود عین نور سیدی عینیؔ کے نور عین​
عشقیؔ کے دل کے چین مرے درد کی دوا​
میرے بزرگ بھی اِسی دَر کے غلام ہیں​
میں بھی کمینہ بندہ اِسی بارگاہ کا​
ما بندۂ قدیم و توئی خواجۂ کریم​
پروردۂ تو ایم بیفزاے قدرِ ما​
جانِ ظہور اب کوئی اِخفا کا وقت ہے​
حائل جو پردہ بیچ میں تھا وہ بھی اُٹھ گیا​
اَسرار کا ظہور ہو شانِ ظہور سے​
اَستار سے اُٹھائیے اب پردۂ خفا​
اعلان سے دکھائیے وہ قادری کمال​
اظہار کیجے شوکتِ قدرت کا برملا​
دروازے کھول دیجیے امدادِ غیب کے​
کاسے لیے کھڑے ہیں بہت دیر سے گدا​
یَا سَیِّدِیْ میں کہہ کے پکاروں بلا کے وقت​
تم لَا تَخَفْ سناتے ہوئے آؤ سرورا​
داتا مرا سوال سنو مجھ کو بھیک دو​
منگتا تمہارا تم کو تمہیں سے ہے مانگتا​
آیا ہے دُور سے یہی سنتا ہوا فقیر​
باڑا بٹے گا حضرتِ نوری کے نور کا​
مجھ سا کوئی سقیم نہ تم سا کوئی کریم​
میری طلب طلب ہے تمہاری عطا عطا​
للہ نگاہِ مہر ہو مجھ تیرہ بخت پر​
آنکھوں کو نور دل کو عنایت کرو جلا​
دارین میں عُلُّو مراتب کرو عطا​
تم مظہرِ علی ہو علی مظہرِ عُلا​
خوش باش اے حسنؔ ترے دشمن ملول ہوں​
جس کا گدا ہے تو وہ ہے غم خوار بے نوا​
تاریخ اب وصالِ مقدس کی عرض کر​
حاصل ہو پورے شعر سے خاطر کا مدعا​
’وہ سید وِلا گئے جب بزمِ قدس میں​
اچھے میاں نے اُٹھ کے گلے سے لگا لیا‘​
۴۸۰ + ۸۴۴۔۔۔۔ ۲۴ ھ ۱۳​
ؤ​
قطعہ تاریخ ولادت با سعادت نبیرہ حضرت اخ الاعظم عالم اہل سنت​
جناب مولانا حاجی محمد احمد رضا خاں صاحب قادری مدظلہم​
بخانہ برخوردار مولوی حامد رضا خاں سلمہم اللہ تعالیٰ​
شکر خالق کس طرح سے ہو اَدا​
اک زباں اور نعمتیں بے اِنتہا​
پھر زباں بھی کس کی مجھ ناچیز کی​
وہ بھی کیسی جس کو عصیاں کا مزا​
اے خدا کیوں کر لکھوں تیری صفت​
اے خدا کیوں کر کہوں تیری ثنا​
گننے والے گنتیاں محدود ہیں​
تیرے اَلطاف و کرم بے انتہا​
سب سے بڑھ کر فضل تیرا اے کریم​
ہے وجودِ اقدسِ خیر الوریٰ​
ہر کرم کی وجہ یہ فضل عظیم​
صدقہ ہیں سب نعمتیں اس فضل کا​
فضل اور پھر وہ بھی ایسا شاندار​
جس پہ سب افضال کا ہے خاتمہ​
اولیا اس کے کرم سے خاص حق​
انبیا اس کی عطا سے انبیا​
خود کرم بھی خود کرم کی وجہ بھی​
خود عطا خود باعثِ جود و عطا​
اس کرم پر اس عطا و جود پر​
ایک میری جان کیا عالم فدا​
کر دے اک نم سے جہاں سیراب فیض​
جوش زن چشمہ کرم کے میم کا​
جان کہنا مبتذل تشبیہ ہے​
اللہ اللہ اُس کے دامن کی ہوا​
جان دی مردوں کو عیسیٰ نے اگر​
اُس نے خود عیسیٰ کو زندہ کر دیا​
بے سبب اُس کی عطائیں بے شمار​
بے غرض اُس کے کرم بے اِنتہا​
بادشا ہو ، یا گدا ہو ، کوئی ہو​
سب کو اُس سرکار سے صدقہ ملا​
سب نے اس در سے مرادیں پائی ہیں​
اور اسی در سے ملیں گی دائما​
جودِ دریا دل کے صدقہ سے بڑھے​
بڑھتے بادل کو گھٹا کہنا خطا​
مَنْ رّاٰنِیْ والے رُخ نے بھیک دی​
کیوں نہ گلشن کی صفت ہو دل کشا​
جلوۂ پاے منور کے نثار​
مہر و مہ کو کتنا اُونچا کر دیا​
اپنے بندوں کو خداے پاک نے​
اس کے صدقہ میں دیا جو کچھ دیا​
مصطفی کا فضل ہے مسرور ہیں​
نعمت تازہ سے عبدالمصطفیٰ​
عالم دیں مقتداے اہلِ حق​
سُنیّوں کے پیشوا احمد رضا​
فضلِ حق سے ہیں فقیرِ قادری​
اِس فقیری نے اُنھیں سب کچھ دیا​
لختِ دل حامد میاں کو شکر ہے​
حق نے بیٹا بخشا جیتا جاگتا​
میں دعا کرتا ہوں اب اللہ سے​
اور دعا بھی وہ جو ہے دل کی دعا​
واسطہ دیتا ہوں میں تیرا تجھے​
اے خدا از فضلِ تو حاجت روا​
عافیت سے قبلہ و کعبہ رہیں​
ہم غلاموں کے سروں پر دائما​
دولت کونین سے ہوں بہرہ ور​
اخِّ اعظم - مصطفی - حامد رضا​
نعمتِ تازہ کو دے وہ نعمتیں​
کیں جو تو نے خاص بندوں کو عطا​
دوست ان سب کے رہیں آباد و شاد​
دشمنِ بد خواہ غم میں مبتلا​
آفریں طبعِ رواں کو اے حسنؔ​
قطعہ لکھنا تھا قصیدہ ہو گیا​
سن ولادت کے دعائیہ لکھو​
’علم و عمر اقبال و طالع دے خدا‘​
1325ھ​
 
مثنوی در ذکر ولادت شریف حضور سرور عالم صلی اللہ علیہ وسلم​
وہ اُٹھی دیکھ لو گردِ سواری​
عیاں ہونے لگے انوارِ باری​
نقیبوں کی صدائیں آ رہی ہیں​
کسی کی جان کو تڑپا رہی ہیں​
مؤدب ہاتھ باندھے آگے آگے​
چلے آتے ہیں کہتے آگے آگے​
فدا جن کے شرف پر سب نبی ہیں​
یہی ہیں وہ یہی ہیں وہ یہی ہیں​
یہی والی ہیں سارے بیکسوں کے​
یہی فریاد رس ہیں بے بسوں کے​
یہی ٹوٹے دلوں کو جوڑتے ہیں​
یہی بند اَلم کو توڑتے ہیں​
اَسیروں کے یہی عقدہ کشا ہیں​
غریبوں کے یہی حاجت روا ہیں​
یہی ہیں بے کلوں کی جان کی کل​
انہیں سے ٹیک ہے ایمان کی کل​
شکیب بے قراراں ہے اُنہیں سے​
قرارِ دل فگاراں ہے اُنہیں سے​
اِنہیں سے ٹھیک ہے سامانِ عالم​
اِنہیں پر ہے تصدق جانِ عالم​
یہی مظلوم کی سنتے ہیں فریاد​
یہی کرتے ہیں ہر ناشاد کو شاد​
اُنہیں کی ذات ہے سب کا سہارا​
انہیں کے دَر سے ہے سب کا گزارا​
انہیں پر دونوں عالم مر رہے ہیں​
انہیں پر جان صدقے کر رہے ہیں​
انہیں سے کرتی ہیں فریاد چڑیاں​
انہیں سے چاہتی ہیں داد چڑیاں​
انہیں کو پیڑ سجدے کر رہے ہیں​
انہیں کے پاؤں پر سر دھر رہے ہیں​
انہیں کی کرتے ہیں اَشجار تعظیم​
انہیں کو کرتے ہیں اَحجار تسلیم​
انہیں کو یاد سب کرتے ہیں غم میں​
یہی دکھ درد کھو دیتے ہیں دم میں​
یہی کرتے ہیں ہر مشکل میں اِمداد​
یہی سنتے ہیں ہر بے کس کی فریاد​
انہیں ہر دم خیالِ عاصیاں ہے​
انہیں پر آج بارِ دو جہاں ہے​
کسے قدرت نہیں معلوم اِن کی​
مچی ہے دو جہاں میں دُھوم اِن کی​
سہارا ہیں یہی ٹوٹے دلوں کا​
یہی مرہم ہیں غم کے گھائلوں کا​
یہی ہیں جو عطا فرمائیں دولت​
کریں خود جَو کی روٹی پر قناعت​
فزوں رُتبہ ہے صبح و شام اِن کا​
محمد مصطفی ہے نام اِن کا​
مزین سر پہ ہے تاجِ شفاعت​
عیاںہے جس سے معراجِ شفاعت​
بدن میں وہ عباے نور آگیں​
کہ جس کی ہر اَدا میں لاکھ تزئیں​
کہوں کیا حال نیچے دامنوں کا​
جھکا ہے رحمتِ باری کا پلّہ​
یہی دامن تو ہیں اے جانِ مضطر​
مچل جائیں گے ہم محشر میں جن پر​
سواری میں ہجومِ عاشقاں ہے​
کوئی چپ ہے کوئی محو فُغاں ہے​
کوئی دامن سے لپٹا رو رہا ہے​
کوئی ہر گام محو اِلتجا ہے​
کوئی کہتا ہے حق کی شان ہیں یہ​
کوئی کہتا ہے میری جان ہیں یہ​
یہ کہتا ہے کوئی بیمارِ فرقت​
ترقی پر ہے اب آزارِ فرقت​
ادھر بھی اِک نظر او تاج والے​
کوئی کب تک دلِ مضطر سنبھالے​
ز مہجوری بر آمد جانِ عالم​
ترحم یا نبی اللہ ترحم​
نہ آخر رَحْمَۃٌ لِّلْعٰلَمِیْنِی​
ز محروماں چرا فارغ نشینی​
بدہ دستے زپا اُفتادگاں را​
بکن دلداریِ دلدادگاں را​
بہت نزدیک آ پہنچا وہ پیارا​
فدا ہے جان و دل جس پر ہمارا​
اُٹھیں تعظیم کو یارانِ محفل​
ہوا جلوہ نما وہ جانِ محفل​
خبر تھی جن کے آنے کی وہ آئے​
جو زینت ہیں زمانے کی وہ آئے​
فقیرو جھولیاں اپنی سنبھالو​
بڑھو سب حسرتیں دل کی نکالو​
پکڑ لو اِن کا دامن بے نواؤ​
مرا ذمہ ہے جو مانگو وہ پاؤ​
مجھے اِقرار کی عادت ہے معلوم​
نہیں پھرتا ہے سائل اِن کا محروم​
کرو تو سامنے پھیلا کے دامن​
یہ سب کچھ دیں گے خالی پا کے دامن​
حسنؔ ہاں مانگ لے جو مانگنا ہو​
بیاں کر آپ سے جو مدعا ہو​
مرے آقا مرے سردار ہو تم​
مرے مالک مرے مختار ہو تم​
تصدق تم پر اپنی جان کر دوں​
ملیں تو دو جہاں قربان کر دوں​
تمہیں افضل کیا سب سے خدا نے​
دیا تاجِ شفاعت کبریا نے​
تمہیں سے لو لگائے بیٹھے ہیں ہم​
تمہارے در پہ آئے بیٹھے ہیں ہم​
تمہارا نام ہم کو حرزِ جاں ہے​
یہی تو داروے دردِ نہاں ہے​
بلا لیجے مدینے میں خدارا​
نہیں اب ہند میں اپنا گزارا​
تمہارا دَر ہو اور ہو سر ہمارا​
اسی کوچے میں ہو بستر ہمارا​
قضا آئے تو آئے اِس گلی میں​
رہے باقی نہ حسرت کوئی جی میں​
نہ ہو گور و کفن ہم کو میسر​
پڑا یوں ہی رہے لاشہ زمیں پر​
سگانِ کوچۂ پُر نور آئیں​
مرے پیارے مرے منظور آئیں​
مرے مُردے پہ ہوں آ کر فراہم​
غذا اپنی کریں سب مل کے باہم​
ہمیشہ تم پہ ہو رحمت خدا کی​
دعا مقبول ہو مجھ سے گدا کی​
تمام شد​
 
Top