دیہات کی رات- فاخر ہریانوی

[کاشفی]

دیہات کی رات​

(فاخر ہریانوی- 1901ء)​

​

چپکے چپکے گیت خاموشی کے گاتی ہے فضا​

دیکھ کر تاروں کی جانب مسکراتی ہے فضا​

​

اوڑھ کر اپنے تنِ نازک پہ چادر چاندنی​

بام گردوں سے اُترتی ہے زمیں پر چاندنی​

​

مسجد و محراب سے شورِ اذاں اُٹھتا نہیں​

سرد اور خاموش چولہوں سے دھواں اُٹھتا نہیں​

​

لیٹ جاتی ہےگھروں میں بیبیاں آرام سے​

آدمی بے فکر ہوجاتے ہیں اپنے کام سے​

​

ساگ لے لے کر گھروں میں پھرنے والی عورتیں​

شوخ اور مُنہ پھٹ مگر شب رنگ کالی عورتیں​

​

سارا دن چکّی پہ محنت کرنے والی لڑکیاں​

کم سے کم اُجرت پہ پانی بھرنے والی لڑکیاں​

​

بھاری بھرکم اور ضدی گاؤں کے سادہ رئیس​

پہلوانوں، مجلسوں، کتّوں کے دلدادہ رئیس​

​

مسجدوں کی کہنہ دیواروں کے رکھوالے امام​

آئے دن پردیسوں سے بخشنے والے امام​

​

خانقاہوں کے مجاور اور بھیک منگے فقیر​

ادھ موئے،م گستاخ، سر اور پاؤں سے ننگے فقیر​

​

موسمی گیتوں سے واقف خوش گلو میراسنیں​

ہر کسی سے لڑنے والی تُندخو میراسنیں​

​

ڈوم جن کی مبتذل باتوں پہ سر دُھنتے ہیں سب​

اپنا اپنا من گھڑت شجرہ نسب سنتے ہیں سب​

​

وہ مدّرس جن کے دم سے مدرسہ آباد ہے​

جن کو سعدی کی گلستاں کچھ زبانی یاد ہے​

​

رفتہ رفتہ نیند سے مدہوش ہوجاتے ہیں سب​

اور اس پُرکیف وادی میں کھو جاتے ہیں سب​

​

آدمی اعمال سے دوچار ہوتے ہیں جہاں​

خواب رُوحوں کے لئے تیار ہوتے ہیں جہاں​

 

[محمد وارث]

شکریہ کاشفی صاحب خوبصورت نظم شیئر کرنے کیلیے