دل گیا ہاتھ سے کیا ہاتھ سے داماں نکلا ۔ اسماعیل میرٹھی

[فرخ منظور]

غزل
(اسماعیل میرٹھی)

دل گیا ہاتھ سے کیا ہاتھ سے داماں نکلا
کہ ترے پاؤں کی مانند گریباں نکلا

مر گئے دیکھ کے آثارِ سحر شامِ وصال
دشمنِ جانِ ستم کش رُخِ جاناں نکلا

دیکھ بے ہوش مجھے اشک فشاں ہیں احباب
جذبۂ شوق تو بد خواہِ عزیزاں نکلا

چارۂ جوشِ جنوں خانہ خرابی نہ ہوئی
گھر سمجھتے تھے جسے ہم، سو بیاباں نکلا

کس قدر دل میں مرے جوشِ شکستِ دل ہے
کوئی سالم نہ ترے تیر کا پیکاں نکلا

بس کہ ہے نقشِ قدم دامِ گرفتاری جاں
اُن کے ہر گام پہ اک گنجِ شہیداں نکلا

پھر گئے دل ہی بیک گردشِ چشمِ کافر
دور میں کوئی بھی تیرے نہ مسلماں نکلا

آخری وقت کسے وعدہ نہ کیا شادیِ مرگ
ہمرہِ جاں دلِ مایوس کا ارماں نکلا

نکلے تم غیر کے گھر سے کہ مری جاں نکلی
جس کو دشوار سمجھتے تھے وہ آساں نکلا

(مولوی اسماعیل میرٹھی)​

 

[ممتازعلی سمیجو]

ماشاءاللہ