جنوں ہلاکِ تخیل، خرد نشانۂ شعر - عبدالرؤف عروج

[پیاسا صحرا]

جنوں ہلاکِ تخیّل، خرد نشانۂ شعر
تمام عالمِ احساس ھے بہانۂ شعر

نسیمِ صبح کے لہجے میں ذکرِ دوست کرو
قبولِ سمع نہیں حرفِ محرمانۂ شعر

اس ایک آنکھ سے پوچھو کہاں سے آیا ھے
غمِ حیات میں انداز دلبرانۂ شعر

ترا جمال دل آرا غزل سہی لیکن
کہاں فسونِ حقیقت کہاں فسانۂ شعر

گلاب سے مہک اٹھے مرے خیالوں میں
کسی کی یاد نے لوٹا دیا زمانۂ شعر

طلسمِ ھوش ربا تھی فضائے شہرِ نگار
مگر یہ خواب سی کیفیّتِ فسانۂ شعر

عبدالرؤف عروج

 

[محمد نعمان]

بہت خوب۔۔۔۔۔۔ بیت شکریہ شیئر کرنے کا

 

[محمد وارث]

کیا لا جواب غزل ہے، واہ واہ واہ

 

[ملائکہ]

ہر شعر ہی خوبصورت ہے