جاگے ہیں بِسرے درد، ہَوا پھر آئی ہے، سعید خان

[شیزان]

جاگے ہیں بِسرے درد، ہَوا پھر آئی ہے​

جاناں کی گلی سے سرد ہَوا پھر آئی ہے​

​

جب گرد و بلا میں گلیوں سے گُلزاروں تک​

سب منظر ہو گئے زرد، ہَوا پھر آئی ہے​

​

کیا مسجد کیا بازار، لہو کا موسم ہے​

کِس قریہ سے بے درد ہَوا پھر آئی ہے​

​

اِک عمر تلک مَیلے سورج کا حَبس رہا​

جب سُلگ اُٹھا ہر فرد ہَوا پھر آئی ہے​

​

کل شجر شجر دھرتی کی جن سے رکھشا تھی​

اب کہاں گئے وہ مرد، ہَوا پھر آئی ہے​

​

میں پال رہا تھا کاغذ کے کچھ زخم سعیدؔ​

سہلانے میرا درد ہَوا پھر آئی ہے​

​

سعیدخان​

"صحرا کا گُلاب"سے انتخاب​

​