بیت بازی

[شمشاد]

رفتہ رفتہ رنگ لایا جذبہِ خاموشیِ عشق
وہ تغافل کرتے کرتے امتحاں تک آ گئے
(قابل اجمیری)

 

[عمر سیف]

یہ ہم ہی جانتے ہیں جدائی کے موڑ پر
اس دل کا جو بھی حال تجھے دیکھ کر ہوا

 

[شمشاد]

آہ اس کشمکشِ صبح و مسا کا انجام
میں بھی ناکام مری سعی عمل بھی ناکام
(ساحر لدھیانوی)

 

[نوید ملک]

میں شب نصیب سہی پھر بھی دل یہ چاہتا ہے
بیاضِ صبح میں کچھ ذکر میرے گھر کا بھی ہو

 

[شمشاد]

وہی اک خاموش نغمہ ہے " شکیل " جانِ ہستی
جو زباں تک نہ آئے جو قلم تک نہ پہنچے
(شکیل بدایونی)

 

[عیشل]

یہ ہم بھی جانتے ہیں،زندگی ایک خواب ہے افسر
مگر اس خواب کی آخر کوئی تعبیر بھی ہوگی

 

[شمشاد]

یہ سبھی کیوں ہے یہ کیا ہے مجھے کچھ سوچنے دے
کون انساں کا خدا ہے مجھے کچھ سوچنے دے
(ساحر لدھیانوی)

 

[ہما]

یونہی ٹھکرا نہ دے کوئی مُحبت کے اصولوں کو
ہم جزبوں ‌کے چراغوں کو نہیں رکھتے طاقوں میں
ہما

 

[فرحت کیانی]

نہ جانے کون دعاؤں میں یاد رکھتا ہے
میں ڈوبتا ہوں، سمندر اُچھال دیتا ہے

 

[محمد وارث]

یہ پھول مجھے کوئی وراثت میں ملے ہیں
تم نے مرا کانٹوں بھرا بستر نہیں دیکھا

بشیر بدر

 

[فرحت کیانی]

اچانک پھر بچایا ہے کسی نادیدہ ہستی نے
مگر کیسے ہُوا یہ معجزہ، معلوم کرنا ہے
تجھے کچھ یاد ہے کل کب میں تُجھ کو یاد آیا تھا؟
مجھے اے ماں! تیرا وقتِ دُعا معلوم کرنا ہے۔

 

[شمشاد]

یادوں کی بوچھاڑوں سے جب پلکیں بھیگنے لگتی ہیں
سُوندھی سُوندھی لگتی ہے تب ماضی کی رُسوائی بھی
(گلزار)

 

[فرحت کیانی]

یہ سوچ کے پلکوں میں چھپا لیتا ہو آنسو
گر کر میری آنکھوں سے ہو جائیں نہ بے گھر

 

[عمر سیف]

روشنی جو تیری آنکھوں میں بسی ہے
ہر کرن اس کو چُرانا چاہتی ہوں

 

[محمد وارث]

نوحے فصیلِ ضبط سے اونچے نہ ہو سکے
کُھل کر دیارِ سنگ میں رویا نہ تُو، نہ میں

خالد احمد

 

[عمر سیف]

نجانے کب میری دُنیا میں مسکرائے گا
وہ ایک شخص جو خوابوں میں بھی خفا سا لگے

 

[فرحت کیانی]

یارب ! وہ نہ سمجھے ہیں نہ سمجھیں گے میری بات
دے اور دل اُن کو، جو نہ دے مجھ کو زباں اور

(غالب)

 

[عمر سیف]

رقصِ مے تیز کرو، ساز کی لے تیز کرو
سوئے میخانہ سفیرانِ حرم آتے ہیں

 

[محمد وارث]

نیتِ شوق بھر نہ جائے کہیں
تو بھی دل سے اتر نہ جائے کہیں

ناصر کاظمی

 

[عمر سیف]

نگاہ و دل کو قرار کیسا، نشاط و غم میں کمی کہاں کی
وہ جب ملے ہیں تو ان سے ہر بار کی ہے الفت نئے سرے سے