بِن ترے رُک سا گیا دِل ہو ہمارا جیسے غزل نمبر 183 شاعر امین شارؔق

[امین شارق]

الف عین سر یاسر شاہ
فاعِلاتن فَعِلاتن فَعِلاتن فِعْلن

بِن ترے رُک سا گیا دِل ہو ہمارا جیسے
ہم سے بِچھڑا ہو کوئی جان سے پِیارا جیسے

دل کو کُچھ بھی نہیں بھاتا ترے بِن جانِ غزل!
چِھن گیا ہو مری آنکھوں سے نظارا جیسے

آنکھ کُھل جاتی ہے شب میں مری اکثر جاناں
ایسا لگتا ہے مُجھےتُم نے پُکارا جیسے

جانے کیوں آج بھی یہ دِل میں گُماں رہتا ہے؟
اُس نے دیکھا ہو مُجھے مُڑ کے دوبارا جیسے

ایسی حالت ہوئی بِن تیرے ہماری جاناں!
جِیتی بازی کوئی اِک پل میں ہو ہارا جیسے

ایک تُو ہے کہ خساروں میں مُنافع جیسا
ایک میں ہُوں کہ مُنافع میں خسارا جیسے

بعد کھونے کے تُجھے ایسی ہے حالت میری
ڈُوبتے شخص سے ہو دُور کِنارا جیسے

ایسے رُوٹھی ہیں مری زِیست سے خُوشیاں شارؔق
میری قِسمت کا گِرا ہو کوئی تارا جیسے​

 

[الف عین]

درست ہے غزل بس مطلع بدلو، کم از کم پہلا مصرع جس کی روانی بہت مخدوش ہے

 

[امین شارق]

درست ہے غزل بس مطلع بدلو، کم از کم پہلا مصرع جس کی روانی بہت مخدوش ہے

سر کیا اب درست رہے گا؟
ہِجرِ جاناں میں رُکا دِل ہو ہمارا جیسے
ہم سے بِچھڑا ہو کوئی جان سے پِیارا جیسے

 

[الف عین]

سر کیا اب درست رہے گا؟
ہِجرِ جاناں میں رُکا دِل ہو ہمارا جیسے
ہم سے بِچھڑا ہو کوئی جان سے پِیارا جیسے

نہیں، روانی فعل + دل ہو ہمارا... کی ہی گربڑ ہے، پورا مصرع ہی بدلنے کی ضرورت ہے

 

[امین شارق]

نہیں، روانی فعل + دل ہو ہمارا... کی ہی گربڑ ہے، پورا مصرع ہی بدلنے کی ضرورت ہے

سر کیا اب درست رہے گا؟
عِشق میں ہوگئے بے یار و سہارا جیسے
یا
عِشق میں یوں ہُوئے بے یار و سہارا جیسے
ہم سے بِچھڑا ہو کوئی جان سے پِیارا جیسے

 

[الف عین]

نہیں میاں، یہ بھی مجھے تو پسند نہیں آیا