اُداس زِیست میں کچھ لوگ با کمال ملے غزل نمبر 186 شاعر امین شارؔق

[امین شارق]

الف عین سر یاسر شاہ
مفاعِلن فَعِلاتن مفاعِلن فَعِلن

اُداس زِیست میں کچھ لوگ با کمال ملے
کہ جِن سے مِل کے ہمیں نِت نئے خیال ملے

اُنہی سے سیکھا ہے ہم نے غموں میں خُوش رہنا
اُنہی کے دم سے ہمیں زِندگی نِہال ملے

جہاں میں لوگ بھی کچھ مکڑیوں سے کم تو نہیں
جہاں جہاں بھی گئے سازشوں کے جال ملے

اگر جو عاشقِ صادق کے گوشوارے بنیں
تلاشنے سے بھی دنیا میں خال خال ملے

خُدا سے شِکوہ نہ کرنا کبھی بھی غُربت کا
خُدا کا شُکر ہے لازم اگرچہ دال ملے

تُمہاری دِید سے ہیں شاد اس قدر جاناں!
کہ جیسے آسماں پر عِید کا ہلِال ملے

ہمیشہ عِشق میں لوگوں نے دُکھ اُٹھائے ہیں
ہر ایک دور میں عاشق خراب حال ملے

سلام دُور سے کرتا ہوں عِشق کو شارؔق
ارے خُدا نہ کرے یہ مجھے وبال ملے​

 

[الف عین]

الف عین سر یاسر شاہ
مفاعِلن فَعِلاتن مفاعِلن فَعِلن

اُداس زِیست میں کچھ لوگ با کمال ملے
کہ جِن سے مِل کے ہمیں نِت نئے خیال ملے​

پہلا مصرع تو ایسا لگتا ہے جیسے پولس نے اداسِ زیست نامی مقام پر چھاپہ مارا تو کچھ لوگ غیر قانونی سرگرمیوں میں ملوث پائے گئے؟ کیا کہنا چاہ رہے ہو میاں، سمجھ میں نہیں آتا

اُنہی سے سیکھا ہے ہم نے غموں میں خُوش رہنا
اُنہی کے دم سے ہمیں زِندگی نِہال ملے​

یہ کن لوگوں کی بات ہو رہی ہے، وہی جو مطلع میں با کمال ملے تھے؟ "نہال ملے" اگر تمنائی ہے تو بیانیہ عجیب لگتا ہے

جہاں میں لوگ بھی کچھ مکڑیوں سے کم تو نہیں
جہاں جہاں بھی گئے سازشوں کے جال ملے​

ٹھیک

اگر جو عاشقِ صادق کے گوشوارے بنیں
تلاشنے سے بھی دنیا میں خال خال ملے​

ردیف یہاں بھی گڑبڑ ہے، فاعل عاشق ہے یا گوشوارے؟

خُدا سے شِکوہ نہ کرنا کبھی بھی غُربت کا
خُدا کا شُکر ہے لازم اگرچہ دال ملے​

کبھی کے ساتھ بھی کا اضافہ مجھے غیر ضروری لگتا ہے، ویسے درست ہے

تُمہاری دِید سے ہیں شاد اس قدر جاناں!
کہ جیسے آسماں پر عِید کا ہلِال ملے​

"آسماں پر" آسَمَپَر" تقطیع ہونا درست نہیں، الفاظ یا ترتیب بدلو

ہمیشہ عِشق میں لوگوں نے دُکھ اُٹھائے ہیں
ہر ایک دور میں عاشق خراب حال ملے​

ٹھیک، عشاق لا َسکو تو بہتر ہے

سلام دُور سے کرتا ہوں عِشق کو شارؔق
ارے خُدا نہ کرے یہ مجھے وبال ملے​

وبال ملنا محاورہ نہیں