ساغر صدیقی ان بہاروں پہ گُلستاں پہ ہنسی آتی ہے - ساغر صدیقی

ان بہاروں پہ گُلستاں پہ ہنسی آتی ہے
دل کے ہر داغِ فروزاں پہ ہنسی آتی ہے

آج پھر جام تہی اور گھٹا اُٹھی ہے
آج پھر رحمتِ یزداں پہ ہنسی آتی ہے

آپ کی زلفِ پریشاں کے تصور میں ہمیں
بارہا گردشِ دوراں پہ ہنسی آتی ہے

میری بھیگی ہوئی پلکوں کی چَھما چَھم پہ نہ جا
تیرے ٹوٹے ہوئے پیماں پہ ہنسی آتی ہے

جب کبھی بچھڑا ہوا دوست ملا ہے کوئی
مجھ کو اخلاصِ عزیزاں پہ ہنسی آتی ہے

مجھ کو اک زہر کا چھلکا ہوا ساغرؔ دے دو
مجھ کو اس دور کے انساں پہ ہنسی آتی ہے​
ساغر صدیقی
 
آخری تدوین:
Top