اساتذہ کی راہنمائی درکار ہے

سر میں سودا بھی نہیں ، دل میں تمنّا بھی نہیں
لیکن اِس ترکِ محبّت کا بھروسہ بھی نہیں

یہ بھی سچ ہے کہ محبت پہ نہیں میں مجبور
یہ بھی سچ ہے کہ ترا حسن کچھ ایسا بھی نہیں

شکوۂ جور کرے کیا کوئی اس شوخ سے جو
صاف قائل بھی نہیں، صاف مکرتا بھی نہیں

بُھول جاتے ہیں کسی کو مگر ایسا بھی نہیں
یاد کرتے ہیں کسی کو، مگر اِتنا بھی نہیں

تم نے پُوچھا بھی نہیں، میں نے بتایا بھی نہیں
کیا مگر راز وہ ایسا تھا کہ جانا بھی نہیں

ایک مُدّت سے تِری یاد بھی آئی نہ ہمیں
اور ہم بھول گئے ہوں تجھے، ایسا بھی نہیں

مہربانی کو محبّت نہیں کہتے، اے دوست
ہائے اب مجھ سے تجھے رنجشِ بیجا بھی نہیں

فطرتِ حُسن تو معلوم ہے، تجھ کو ہمدم
چارہ ہی کیا ہے بجُز صبر، سو ہوتا بھی نہیں

نگہِ ناز کی نیّت کا پتہ بھی نہیں اور
دلِ دیوانہ کا ، معلوم اِرادہ بھی نہیں

بےخودی ہوش نُما، ہوش بھی غفلت آرا
اِن نِگاہوں نے کہیں کا مجھے رکھّا بھی نہیں

یوں تو ہنگامے اُٹھاتے نہیں دیوانۂ عِشق
مگر اے دوست، کچھ ایسوں کا ٹھکانہ بھی نہیں

تجھ سے سنبھلیں تو سنبھال اپنے حجابِ بیباک
ہیں اُٹھانا حدِ آداب تماشہ بھی نہیں

دل کی گِنتی نہ یگانوں میں نہ بیگانوں میں
لیکن اِس جلوہ گہِ ناز سے اُٹھتا بھی نہیں

آج غفلت بھی اِن آنکھوں میں ہے پہلے سے سوا
اور دلِ ہجر نصیب آج شکیبا بھی نہیں

ہم اُسے منہ سے بُرا تو نہیں کہتے، کہ فراق
دوست تیرا ہے، مگر آدمی اچھا بھی نہیں

(رگھوپتی سہائے فراقؔ گورکھپوری)
جناب الف عین صاحب، محمد ریحان قریشی صاحب
فراق صاحب کی اس غزل میں مطلع میں ’بھروسہ‘ کو ’بھروسا‘ کرنے سے(جیسا محفل پر ہی کسی لڑی میں دیکھا تھا) قوافی والا معاملہ ٹھیک ہو جاتاہے۔ لیکن باقی اشعار میں ’ارادہ‘، ’دیوانہ‘، ’ٹھکانہ‘ اور ’تماشہ‘ کے بارے میں آپ حضرات کی کیا رائے ہے؟
 
فراق صاحب کی اس غزل میں مطلع میں ’بھروسہ‘ کو ’بھروسا‘ کرنے سے(جیسا محفل پر ہی کسی لڑی میں دیکھا تھا) قوافی والا معاملہ ٹھیک ہو جاتاہے۔ لیکن باقی اشعار میں ’ارادہ‘، ’دیوانہ‘، ’ٹھکانہ‘ اور ’تماشہ‘ کے بارے میں آپ حضرات کی کیا رائے ہے؟
بھروسہ غلط العام املا ہے، درست بھروسا ہی ہے۔ قوافی کے بارے میں پہلے بھی عرض کر چکا ہوں کہ الف اور ہائے ہنوز اگر لفظ کے آخر میں آئیں تو برابر ہیں۔
 
بھروسہ غلط العام املا ہے، درست بھروسا ہی ہے۔ قوافی کے بارے میں پہلے بھی عرض کر چکا ہوں کہ الف اور ہائے ہنوز اگر لفظ کے آخر میں آئیں تو برابر ہیں۔
بہت شکریہ محترم ریحان صاحب
میں سمجھا شاید سختیاں صرف مبتدیوں کے لیے ہی ہیں۔ :cry:
 

الف عین

لائبریرین
قوافی تو درست ہیں ہی۔ صرف املا کا سوال ہے۔ میرے خیال میں بھروسا ،ٹھکانا، تماشا لکھا جانا چاہیے تھا۔ خود فراق نے کیا لکھا ہے، معلوم نہیں۔
 
قوافی تو درست ہیں ہی۔ صرف املا کا سوال ہے۔ میرے خیال میں بھروسا ،ٹھکانا، تماشا لکھا جانا چاہیے تھا۔ خود فراق نے کیا لکھا ہے، معلوم نہیں۔
بہت شکریہ جناب الف عین صاحب، لیکن ’ارادہ‘ اور ’دیوانہ‘ کے بارے میں املا کے بجائے تلفظ کے حساب سے قوافی درست تصور کیے جا سکتے ہیں؟
 
Top