آنکھوں میں حیا آ جاتی ہے ہونٹوں پہ تبسم لاتے ہیں

[سیما علی]

آنکھوں میں حیا آ جاتی ہے ہونٹوں پہ تبسم لاتے ہیں
وہ مجھ پہ ستم جب کرتے ہیں تصویر کرم بن جاتے ہیں

اب آپ عنایت کرنے کی تکلیف ہی کیوں فرماتے ہیں
دن یوں بھی گزرنے ہی ٹھہرے دن یوں بھی گزر ہی جاتے ہیں

اللہ رے خس و خاشاک سے یہ ہنس ہنس کے چٹانوں کا کہنا
وہ طوفاں کو کیا سمجھیں گے جو طوفاں میں بہہ جاتے ہیں

اک سمت مسلسل امیدیں اک سمت مسلسل محرومی
کب تک یہ اٹھے بار ہستی شانے ہیں کہ ٹوٹے جاتے ہیں

اب ایسی کرم کی باتوں سے دبتی ہیں کہیں دل کی چوٹیں
تم جتنا مٹاتے جاتے ہو یہ نقش ابھرتے آتے ہیں

اس دور پریشانی میں کبھی وہ وقت بھی آتا ہے عالیؔ
کچھ دل بھی دھوکے کھاتا ہے کچھ وہ بھی کرم فرماتے ہیں

جمیل الدین عالیٓ

 

[شمشاد]

اب ایسی کرم کی باتوں سے دبتی ہیں کہیں دل کی چوٹیں
تم جتنا مٹاتے جاتے ہو یہ نقش ابھرتے آتے ہیں

جمیل الدین عالیؔ کا خوبصورت کلام

شریک محفل کرنے کا شکریہ۔

 

[سیما علی]

اب ایسی کرم کی باتوں سے دبتی ہیں کہیں دل کی چوٹیں
تم جتنا مٹاتے جاتے ہو یہ نقش ابھرتے آتے ہیں

جمیل الدین عالیؔ کا خوبصورت کلام

شریک محفل کرنے کا شکریہ۔

بھیا یہ بینکنگ کونسل کے ممبر بورڈ تھے اور جب ہمارا سلیکشن فرسٹ ویمن بینک کے لئے ہوا تو ہمارا انڑویو اُِنھوں نے لیا انتہائی نفیس آدمی اور بہت دوستانہ ماحول میں بات چیت نہ اپنے عہدے کا رعب ڈالتے اور انڑویورر کے لیول پر آکر بات کیا کرتے انتہائی ادبی کفتگو ۔۔۔اُس وقت فرسٹ ویمن بینک کی پریذیڈنٹ مس اکرم خاتون تھیں۔
آپکی آپی کو یہ اعزاز حاصل ہے کہ عالی صاحب سے ہماری دو ملاقاتیں ہیں اور دونوں یادگار ۔۔۔۔