بیت بازی سے لطف اٹھائیں (3)

[شمشاد]

زونی تمہیں تو حرف ح سے شعر دینا تھا۔
- - - - - - - - - - - - - - - - - - - - - - - - -

آہ وہ جراءتِ فریاد کہاں
دل سے تنگ آ کے جگر یاد آیا
(چچا)

 

[زونی]

ادائے مطلبِ دل ہم سے سیکھ جائے کوئی
انہیں سُنا ہی دیا حال داستاں کی طرح
(داغ دہلوی)

ہم کو معلوم ھے جنت کی حقیقت لیکن
دل کے بہلانے کو غالب یہ خیال اچھا ھے



غالب۔

 

[شمشاد]

یہ کُفر و دیں کا فسانہ یہ ذکرِ دیر و حرم
عزیز ہے مگر ان کی توجیحات کے بعد
(شمیم جے پوری)

 

[راجہ صاحب]

دل ہجر کے درد سے بوجھل ہے، اب آن ملو تو بہتر ہے
اس بات سے ہم کو کیا مطلب،یہ کیسے ہو، یہ کیونکر ہو

نامعلوم

 

[شمشاد]

وعدہ کر کے یہ کون آیا نہیں
شہر میں آج روشنی کم ہے
(یمنی داس)

 

[راجہ صاحب]

یہ معجزہ بھی محبت کبھی دکھائے مجھے
کہ سنگ تجھ پہ گرے اور زخم آئے مجھے

 

[شمشاد]

یاد کرنے پر بھی دوست آئے نہ یاد
دوستوں کے کرم یاد آتے رہے
(خمار بارہ بنکوی)

 

[راجہ صاحب]

یہ دکھُ لئے نہیں میں نے ،دئے گئے مجھکو
یہ فاصلے ،یہ تھکن ،یہ ڈگر نصیب میرا

 

[شمشاد]

اک دھندلا سا تصور ہے کہ دل بھی تھا یہاں
اب تو سینے میں فقط اک ٹیس سی پاتا ہوں میں
(آغا حشر)

 

[راجہ صاحب]

نزع کے وقت کے جب مری سانسوں میں انتشار ہو
مری نظر کے سامنے گنبد ہو وہ ہرا فقط

نامعلوم

 

[شمشاد]

طرز جینے کا سکھاتی ہے مجھے
تشنگی زہر پلاتی ہے مجھے

رات بھر رہتی ہے کس بات کی دھن
نہ جگاتی ہے نہ سلاتی ہے مجھے
(خلیل الرحمن اعظمی)

 

[راجہ صاحب]

یارب وہ نہ سمجھے ہیں نہ سمجھیں گے مری بات
دے اور دل ان کو، جو نہ دے مجھ کو زباں اور

 

[شمشاد]

رُوئے گُل پر روز و شب کس شوق سے رہتا ہے باز
رخنۂ دیوار ہے یا دیدۂ نظارگی
(میر تقی میر)

 

[راجہ صاحب]

یہ عشق نہیں آساں بس اتنا سمجھ لیجے
اِک آگ کا دریا ھے اور ڈُوب کر جانا ھے

 

[شمشاد]

راجہ صاحب یہ جگر مراد آبادی کی غزل شعر ہے اور دوسرے مصرعے میں ڈوب کر کی بجائے ڈوب کےجانا ہے۔

مطلع ہے :
اک لفظ محبت کا اتنا سا فسانہ ہے
سمٹے تو دلِ عاشق ، پھیلے تو زمانہ ہے

یہ عشق نہیں آساں بس اتنا سمجھ لیجے
اک آگ کا دریا ہے اور ڈوب کے جانا ہے
- - - - - - - - - - - - - - - - - - - - - - - - - - -


یہ کس کا تصور ہے یہ کس کا فسانہ ہے
جو اشک ہے آنکھوں میں تسبیح کا دانہ ہے
(جگر مراد آبادی)

 

[مقدس]

یہ راستہ ہے مگر ہجرتی پرندوں کا
یہاں سمے کے مسافر قیام کرتے ہیں
وفا کی قبر پہ کب تک اسے جلا رکھیں
سو یہ چراغ ہواؤں کے نام کرتے ہیں

 

[شمشاد]

خوشی ہوئی مقدس کو اس دھاگے میں دیکھ کر۔
----------------------------------


یا وہ تھے خفا ہم سے یا ہم تھے خفا اُن سے
کل اُن کا زمانہ تھا آج اپنا زمانہ ہے
(جگر مراد آبادی)

 

[مقدس]

میں تو پہلے بھی آئی تھی بھیا۔۔۔
شاعری کا یہ شوق میرے نانا جی کی وجہ سے ہے
۔۔۔۔۔۔۔۔۔۔۔۔۔۔


یہ دن بھی قیامت کی طرح گزرا ہے فراز
جانے کیا بات تھی ہر بات پہ رونا آیا

 

[شمشاد]

آنسو تو بہت سے ہیں آنکھوں میں جگرؔ لیکن
بندھ جائے سو موتی ہے رہ جائے سو دانہ ہے
(جگر مراد آبادی)

 

[مقدس]

یہ کیا طِلسم ہے، دریا میں بن کے عکسِ قمر
رُکے ہوئے بھی تمھی ہو، رواں دواں بھی تمھی