برائے اصلاح - زندگی اس مے کدے کا نام ہے

[فلسفی]

سر الف عین اور دیگر احباب سے اصلاح کی گذراش ہے۔

زندگی اس مے کدے کا نام ہے
عمرِ رفتہ جس کا خالی جام ہے

اہلِ ظاہر کا وہاں کیا کام ہے
جس جگہ نعرہ انا الحق عام ہے

جلد بازو! دیکھ کر کاٹو ذرا
میرے سر پر قیمتی انعام ہے

اصل میں ہے ان کی آنکھوں کا قصور
زاہدو! یہ مے یونہی بدنام ہے

ساحلوں کو چومتی ہے بار بار
موجِ دریا پر عجب الزام ہے

چاند سے پہلے چلے جانا عزیز!
دو گھڑی ٹھہرو ابھی تو شام ہے

شمع سے لپٹی ہے پروانے کی راکھ
عشق کا تکلیف دہ انجام ہے

دیکھ اِس مردے کے چہرے کی طرف
پڑھ جو عبرت کے لیے پیغام ہے

نفس کو قابو میں رکھ بس موت تک
بعد اس کے فلسفیؔ آرام ہے​

 

[الف عین]

کوئی تکنیکی غلطی تو محسوس نہیں ہوتی
چاند سے پہلے چلے جانا مراد؟ چاند نکلنے سے پہلے یا چاند ڈھلنے کے بعد؟ اس بیانیہ سے کنفیوژن ہوتا ہے

 

[فلسفی]

شکریہ سر

چاند سے پہلے چلے جانا مراد؟ چاند نکلنے سے پہلے یا چاند ڈھلنے کے بعد؟ اس بیانیہ سے کنفیوژن ہوتا ہے

سر مجھے تو یہ کنفیوژن زیادہ لطف دے رہا ہے جس کا آپ نے ذکر کیا گو شعر کہتے ہوئے میں نے چاند کے رخصت ہونے کی بات سوچی تھی۔