نظر لکھنوی نعت: نظامِ آفرینش کا تو ہی عنوان ہے ساقی

دادا مرحوم کے گلہائے عقیدت بحضور خیر الانامﷺ

نظامِ آفرینش کا تو ہی عنوان ہے ساقی
بجسمِ عالمِ امکاں تو مثلِ جان ہے ساقی

ترا میخانۂ وحدت عظیم الشان ہے ساقی
برائے میگساراں دورِ مے ہر آن ہے ساقی

مئے وحدت، مئے کوثر، مئے عرفان ہے ساقی
ترے رندوں کی خاطر اف بڑا سامان ہے ساقی

خدا کے فضل سے تجھ پر مرا ایمان ہے ساقی
نہیں دل ہی سے پیارا تو عزیز از جان ہے ساقی

ہدایت کے لئے سب کی ترا قرآن ہے ساقی
قیامِ حشر تک سرچشمۂ فیضان ہے ساقی

کھرے کھوٹے عمل کا فیصلہ آسان ہے ساقی
تری سنت برائے ہر عمل میزان ہے ساقی

گروہِ عاشقاں میں جن کی اونچی شان ہے ساقی
ابو بکرؓ و عمرؓ حیدرؓ ہے اور عثمانؓ ہے ساقی

شبِ معراج کہتی یہ علی الاعلان ہے ساقی
تو جلوہ گاہِ یزداں میں ہوا مہمان ہے ساقی

تری تعلیم ہی سے آدمی انسان ہے ساقی
گروہِ ابنِ آدم پر ترا احسان ہے ساقی

حسابِ زندگی دینا بروزِ حشر مشکل ہے
ترا دامن پکڑ لینا مجھے آسان ہے ساقی

خدا کو مان کر واحد نہ لائے تجھ پہ جو ایماں
مرے ایمان کی رو سے وہ بے ایمان ہے ساقی

تری سیرت کو یکجا کر کے جب اس پر نظر ڈالی
تو پایا ہم نے وہ تو ہو بہو قرآن ہے ساقی

٭٭٭

محمد عبد الحمید صدیقی نظرؔ لکھنوی
 

محمداحمد

لائبریرین
سبحان اللہ !

بہت خوب کلام ہے۔
خدا کے فضل سے تجھ پر مرا ایمان ہے ساقی
نہیں دل ہی سے پیارا تو عزیز از جان ہے ساقی

ہدایت کے لئے سب کی ترا قرآن ہے ساقی
قیامِ حشر تک سرچشمۂ فیضان ہے ساقی

کھرے کھوٹے عمل کا فیصلہ آسان ہے ساقی
تری سنت برائے ہر عمل میزان ہے ساقی

کیا کہنے! بہت اعلیٰ!
 

نایاب

لائبریرین
دل کو جو لگ جائے پیارا ۔۔۔۔۔۔۔۔۔
حق ۔۔۔۔۔۔۔۔۔۔۔
تری تعلیم ہی سے آدمی انسان ہے ساقی
گروہِ ابنِ آدم پر ترا احسان ہے ساقی
naat1.jpg

ورڈ کا تجربہ ۔۔۔۔۔۔۔۔
اللہ سوہنا ہمارے لیئے ہر سفر آسان فرمائے آمین
ڈھیروں دعائیں
 
Top