آپ کے پسندیدہ اشعار!

[طارق شاہ]

برف گرماتی رہی، دُھوپ اماں دیتی رہی !
دل کی نگری میں جو موسم تھے، تِرے موسم تھے

میری پونجی، مِرے اپنے ہی لہو کی تھی کشید
زندگی بھر کی کمائی، مِرے اپنے غم تھے

احمد ندیم قاسمی

 

[طارق شاہ]

چُھپتی نہیں چُھپائے سے اُلفت کی داستان
کیا قہر ہے یہ دیدۂ پُرنم کئے ہوئے

نہال سیوہاروی

 

[طارق شاہ]

‫گر آج اَوج پہ ہے طالعِ رقیب تو کیا
یہ چار دن کی خُدائی تو کوئی بات نہیں

جو تجھ سے عہدِ وفا اُستُوار رکھتے ہیں
علاجِ گردشِ لیل و نہار رکھتے ہیں

فیض احمد فیض

 

[طارق شاہ]

جُز دل کوئی مکان نہیں دہر میں جہاں !
رہزن کا خوف بھی نہ رہے، در کُھلا بھی ہو

ناصر کاظمی

 

[طارق شاہ]

نغمۂ شوق مِرا، جُنْبشِ لب تک پہنچا
سِلسِلہ تیری تمنّا کا، طلب تک پہنچا

اور کیا اِس سے سوا حُسنِ طلب ہے، عاجز
حد سے گزرا بھی تو میں حدِ ادب تک پہنچا

مشتاق عاجز

 

[طارق شاہ]

اُمیدِ رنگ و بُو رکھّی ہوئی ہے
تمنّائے سبُو رکھّی ہوئی ہے

زباں کو بے طلب رکھّا ہُوا ہے
انا کی آبرو رکھّی ہوئی ہے

مشتاق عاجز

 

[طارق شاہ]

سینے میں دل ہے، دل میں مگر تاب و تب کہاں
جو بات تھی شباب میں، باقی وہ اب کہاں

حُسین انجم

 

[طارق شاہ]

طے کرتے ہیں، نِگاہ سے دل کے مُعاملے !
کُھلتے ہیں گفتگو میں حسِینوں کے لب کہاں

حُسین انجم

 

[طارق شاہ]

وہ میرے پاؤں کو چُھونے جُھکا تھا جس لمحے
جو مانگتا اُسے دیتی، امیر ایسی تھی

کتر کے جال بھی صیّاد کی رضا کے بغیر
تمام عمر نہ اُڑتی، اسیر ایسی تھی

پروین شاکر

 

[طارق شاہ]

اب کون سے موسم سے، کوئی آس لگائے
برسات میں بھی، یاد نہ جب اُن کو ہم آئے

پروین شاکر

 

[طارق شاہ]

تِرا کمال، کہ پاؤں میں بیڑیاں ڈالیں
غزالِ شوق کہاں کا اسیر ایسا تھا

پروین شاکر

 

[طارق شاہ]

رشک سے مِٹ مِٹ گئے، ہم تشنہ کامانِ وصال
جب مِلا لب ہائے ساقی سے، لبِ پیمانہ آج

حسرت موہانی

 

[طارق شاہ]

ہیں سُرُورِ وصل سے لبریز مشتاقوں کے دل !
کر رہی ہیں، آرزوئیں سجدۂ شُکرانہ آج

حسرتیں دل کی ہُوئی جاتی ہیں، پامالِ نِشاط
ہے جو وہ جانِ تمنّا، رَونقِ کاشانہ آج

حسرت موہانی

 

[طارق شاہ]

نہیں آتی، تو یاد اُن کی مہینوں تک نہیں آتی !
مگر جب یاد آتے ہیں، تو اکثر یاد آتے ہیں

حقیقت کُھل گئی حسرت، تِرے ترکِ محبّت کی
تجھے تو، اب وہ پہلے سے بھی بڑھ کر یاد آتے ہیں

حسرت موہانی

 

[طارق شاہ]

داغ کی شامت جو آئی اضطراب شوق میں !
حالِ دِل کمبخت نے، سب اُن کے منہ پر رکھ دیا

داغ دہلوی

 

[طارق شاہ]

شرح بے دردیِ حالات نہ ہونے پائی
اب کے بھی دل کی مدارات نہ ہونے پائی

پھر وہی وعدہ، جو اِقرار نہ ہونے پایا !
پھر وہی بات جو اثبات نہ ہونے پائی

فیض احمد فیض

 

[طارق شاہ]

بتائیں کیا، کہ بنایا ہے اُس نے کاجل سے
نظر سے دل میں اُترتا جو خال، کیا شے ہے

ہے مشتِ خاک میں جاری وہ رقصِ بے ہنگام
مقابلے میں کہ جس کے دھمال کیا شے ہے

شفیق خلش

 

[طارق شاہ]

کیوں یاس! قفس میں بھی وہی زمزمہ سنجی !
ایسا تو زمانے میں کوئی دل نہیں رکھتا

یاس، یگانہ، عظیم آبادی

 

[طارق شاہ]

کیسا نِکھر گیا ہے شبستانِ آرزو
آئے ہیں آج کِس کی نظر سے گُزر کے خواب

حزیں صدیقی

 

[طارق شاہ]

دن بھر کے زخم آنکھ سے رِستے ہیں رات بھر
آئے کسی کو نیند تو دیکھے سَحر کے خواب

حزیں صدیقی