حزیں صدیقی یہ گردِ راہ چھٹے تو کہیں نظر ٹھہرے

مہ جبین

محفلین
یہ گردِ راہ چھٹے تو کہیں نظر ٹھہرے
سجھائی دے کہ مرے پیشرو کدھر ٹھہرے

یہ ارتقا کا تقاضا ہے کچھ بعید نہیں
کبھی خیال کی رفتار پر سفر ٹھہرے

جو سات رنگ سے گزرے تو ایک رنگ ملا
اُس ایک رنگ سے گزرے تو دیدہ ور ٹھہرے

ہنوز جاگتے خوابوں کا ہے سفر جاری
کہو کہ عمرِ رواں ہم سے پوچھ کر ٹھہرے

نگار خانہء آواز ہو کہ دشتِ سکوت
جہاں قرار ہو دل کو جہاں نظر ٹھہرے

تمام زاویہء حُسن سے وہ خوب سہی
مری نگاہ میں ٹھہرے تو معتبر ٹھہرے

خدا کی دَین ہے خود آگہی حزیں ورنہ
ہزار اہلِ خبر خود سے بے خبر ٹھہرے

حزیں صدیقی
 
Top