یادِ ایام - تابش صدیقی

[کاشفی]

یادِ ایام​

(ایک چاندنی رات کا تصّور)​

​

سکوتِ شام تھا، ہم تم تھے، دریا کا کنارہ تھا​

جدا ہونے سے پہلے کس قدر دلکش نظارہ تھا​

​

کسی نے آسماں سے حُسن کے موتی بکھیرے تھے​

فضا میں قاف کی پریوں کے جلوؤں کے بسیرے تھے​

​

شباب و حُسن کی رنگینیاں تھیں جلوہ زا گویا​

فضا کا ذرّہ ذرّہ اک سراپا شعر تھا گویا​

​

شرابِ حُسن سے مخمور تھا ہر قطرہ دریا کا​

ہجومِ کیف سے معمور تھا ہر قطرہ دریا کا​

​

نچھاور ہورہی تھی چاندنی تیری جوانی پر​

جوانی چھارہی تھی عشق و الفت کی کہانی پر​

​

سفینہ چاندنی کا تھا رواں دریا کے سینے پر​

ہمارے عیش کے دن جارہے تھے اس سفینے پر​

​

یہ راتیں آہ یہ رنگینیاں سب کھو گئیں مجھ سے​

تری الفت میں حاصل تھیں مگر اب کھوگئیں مجھ سے​

 

[محمد وارث]

لاجواب۔

بہت شکریہ جناب شیئر کرنے کیلیے۔