واصف ہولے ہولے بدل گئی اے اپنی ہی تصویر - واصف علی واصفؒ

ہولے ہولے بدل گئی اے اپنی ہی تصویر
اندرو اندر کم کر جاندی بندے دی تقدیر

اُنج تے بڑے کرم ہوئے نیں، بڑیاں رحمتاں ہوئیاں
میری اک دُعا پرانی ، لبھدی پھرے تاثیر

حسن اساڈی منزل ہوئی، درد اَساڈی راہ
ہاواں ہنجو سنگت ساڈی ، عشق اساڈا پیر

جِتّھے تخت خزانے ہوون اوتھے اساں نہ جانا
جِتّھے عشق دے تنبو لگّن او ساڈی جاگیر

لوح قلم دی طاقت دے ماتحت زمانے سارے نیں
رانجھے کھیڑے ویکھدے رہ گئے وارث لے گیا ہیر​
واصف علی واصفؒ
 
Top