لقمان پنجابی
محفلین
اسلام آباد ___ امریکی سفارتخانے دے ڈپٹی چیف آف مشن تھامس ای۔ ویلیمز نے اج جنرل الیکٹرک، حکومت پاکستان دے حکام تے کاروباری لوکاں نال اک ملاقات چ ہوا نال کم کرن آلیاں بجلی بناون دیاں مشیناں ذریعے پاکستان چ توانائی دی تھوڑ دا مسئلہ حل کرن دے حوالے نال امریکی سرکار دے عزم دا یقین دوایا۔ امید اے کے ہوا نال بجلی پیدا کرن آلے اے منصوبہ 2015 تائیں قومی گرڈ چ 1750 میگاواٹ صاف تے قابل تجدید توانائی دا وادھا کرن لگ پوے گا۔
ڈپٹی چیف آف مشن، تھامس ویلیمزنے اسلام آباد چ حکومت پاکستان دے افسراں، جنرل الیکٹرک دے وڈے درجے دے ملازماں، جناں چ جنرل الیکٹرک دے بورڈ دے وائس چیئرمین جان رائس وی شامل سن، تے نجی شعبے وچ ہوا نال بجلی بناون دے ماہراں نال خطاب کردے ہوئے آکھیا کے ہوا نال توانائی پیدا کرن لئی جاری اے منصوبے سرکاری تے نجی اشتراک دی اک مثبت مثال نے۔ اناں نے آکھیا کے امریکہ دی سمندر پارنجی سرمایہ کاری کارپوریشن (او پی آئی سی)،جیڑا کے امریکہ دا ایک ترقیاتی بینک اے، سیفائرونڈ پاور کمپنی لمیٹڈ دے نال لمی مدت تے گھٹ شرح سود آلی سرمایہ کاری لئی گل بات کررہی اے، تے ہوا نال بجلی پیدا کرن لئی چار ہور منصوبے وی مالی لیکھت پڑھت دے مختلف مراحل وچ نے۔ جنرل الیکٹرک اناں تمام منصوبیاں لئی ٹربائنیاں دیوے گا۔
اک پاسے اناں پنچ منصوبیاں کارن پاکستان دے قومی گرڈ وچ ۲۵۰ میگا واٹ دا وادھا ہووے گا تے دوجے پاسے امریکی ادارہ برائے بین الاقوامی ترقی (یوایس ایڈ)بجلی دی ترسیل آلیاں لائیناں نوں اپ گریڈ کرن لئی مدد وارے منصوبہ بندی کرریہا اے جیدے نال علاقے وچ توانائی دے کل 25 منصوبیاں نوں فائدہ ہووے گا۔ امید اے کے اناں سارے منصوبیاں کارن 2015 تائیں قومی گرڈ چ 1750 میگاواٹ صاف تے قابل تجدید توانائی دا وادھا ہوجاوے گا۔
جنرل الیکٹرک، جیڑا سندھ وچ بجلی دے منصوبیاں لئی ہوا نال چلن آلیاں ٹربائیناں سپلائی کرن آلا اہم ادارہ اے، نے ڈپٹی چیف آف مشن نوں ہوا نال بجلی پیدا کرنے آلے منصوبیاں تے جاری کم وارے ہوون آلی کارکردگی وارے دسیا۔۔ جی ای دے وفد نے توقع ظاہر کیتی کے حکومت پاکستان اناں منصوبیاں وارے ضروری کاغذی کروائی تے اجازت نامیاں دی چھیتی منظوری لئی جنرل الیکٹرک دے نال پورا تعاون کرے گی۔