ہر وقت نوحہ خواں سی رہتی ہیں میری آنکھیں - اختر انصاری دہلوی

[کاشفی]

غزل​

اختر انصاری دہلوی​

​

​

ہر وقت نوحہ خواں سی رہتی ہیں میری آنکھیں​

اِک دُکھ بھری کہانی کہتی ہیں میری آنکھیں​

​

عیش و طرب کے جلسے، درد و الم کے منظر،​

کیا کچھ نہ ہم نے دیکھا، کہتی ہیں میری آنکھیں​

​

جب سے دل و جگر کی ہمدرد بن گئی ہیں​

غمگینیوں میں ڈوبی رہتی ہیں میری آنکھیں​

​

لبریز ہو کے دل کا ساغر چھلک اُٹھا ہے​

شاید اسی سبب سے بہتی ہیں میری آنکھیں​

​

ہر جنبشِ نظر ہے رودادِ عشق اختر​

ہیں بے زباں مگر کچھ کہتی ہیں میری آنکھیں​

​

 

[محمد وارث]

بہت شکریہ جناب پوسٹ کرنے کیلیے۔