مصطفیٰ زیدی کراہتے ہوئے دل

[غزل قاضی]

کراہتے ہوئے دِل​

​

مَیں اسپتال کے بستر پہ تم سے اتنی دُور​

یہ سوچتا ہُوں کہ ایسی عجیب دُنیا میں​

نہ جانے آج کے دن کیا نہیں ہُوا ہو گا​

کِسی نےبڑھ کے ستارے قفس کیے ہوں گے​

کسی کے ہات میں مہتاب آگیا ہو گا​

جلائی ہوں گی کِسی کے نفَس نے قِندیلیں​

کِسی کی بزم میں خورشید ناچتا ہو گا​

کِسی کو ذہن کا چھوٹا سا تازیانہ بہت​

کسی کو دل کی کشاکش کا حوصلہ ہو گا​

نہ جانے کِتنے ارادے اُبھر رہے ہوں گے​

نہ جانے کِتنے خیالوں کا دل بڑھا ہو گا​

تمھاری پُھول سی فطرت کی سِطح نرم سے دُور​

پہاڑ ہوں گے ، سمندر کا راستہ ہو گا​

​

یہ ایک فرض کا ماحَول ، فرض کا سنگیت​

یہ اسپتال کے آنسُو ، یہ اسپتال کی رِیت​

مرے قریب بہت سے مریض اور بھی ہیں​

پُکارتی ہُوئی آنکھیں ، کراہتے ہُوے دِل​

بہت عزیز ہے اِن سب کو زندگی اپنی​

"یہ اپنی زیست کا احساس کیسی نعمت ہے "​

​

مگر مجھے یہی الجھن کہ زندگی کی یہ بھیک​

جو مِل گئی بھی تو کِتنی ذرا سی بات مِلی​

کِسی کے ہات مہتاب آگیا بھی تو کیا​

کسی کے قدموں میں سُورج کا سرجُھکا بھی تو کیا​

ہُوا ہی کیا جو یہ چھوٹی سی کائنات مِلی ؟​

مرے وجُود کی گہری ، خموش ویرانی​

تمھیں یہاں کے انّدھیرے کا عِلم کیا ہو گا​

تمھیں تو صرف مقّدر سے چاند رات مِلی​

​

مصطفیٰ زیدی​

​

( شہر ِ آزر )​