ڈاکٹر غلام سرور : افغانستان ۔آج کا یک منظر دل خراش

[سید زبیر]

افغانستان ۔آج کا یک منظر دل خراش​

​

میرے پرکھوں کی سر زمین وطن​

سخت جانوں کا مسکن اعلیٰ​

ہر جفا کش کی محنتوں کا امیں​

شیر بچوں کا پالنے والا​

جس کے دامن پر بتوں کے ستون​

آسمانوں کو رام کرتے ہیں ​

باد صر صر کے یخ بھرے جھونکے ​

خنجروں سے کلام کرتے ہیں ​

وادیوں کے شفیق دامن پر ​

مغربی فوجیوں کا قبضہ ہے​

کھیت کھلیان بین کرتے ہیں​

گلستانوں میں غم کا ڈیرہ ہے​

گاؤں گاؤ ں پہ خوف ہے طاری​

جیسے آسیب کا بسیرا ہے​

چار دیواریوں میں مٹی کی​

لوگ سہمے ہوئے سے لگتے ہیں​

جسم و جاں پر عذاب سا نازل​

روح زخمی ہے اور بدن گھائل​

پیچ در پیچ دم بخود گلیاں​

جن میں روتی ہیں عصمتیں عریاں​

چاند آدھا ہے اور فضا مغموم​

پیڑ لرزاں ہیں اور ہوا مسموم​

جھیل پر جیسے ہول سا طاری​

کپکپاتے ہیں جس میں کچھ تارے​

ہلکی ہلکی آہٹوں پر بھی ​

وحشتوں کا گماں گذرتا ہے​

بادلوں کے مہیب سایوں پر ​

دہشتوں کا سماں ابھرتا ہے ​

پربتوں کے اداس چہروں پر​

زرد سی چاندنی کا پہرہ ہے ​

ایک ٹیلے کی اوٹ سے یک دم ​

ایک فوجی ٹرک نکلتا ہے​

اور دھواں دھول خوب بکھرا کر ​

گاؤ ں کی سمت تیز بڑھتا ہے​

پھر اچانک وہ اک دھماکے سے ​

چیتھڑے ہو کے دور گرتا ہے ​

آگ اور خوں کے اس الاؤ سے ​

ایک فوجی فقط ابھرتا ہے​

کالے بارود کے دھوئیں میں گرا ​

اس کا گورا بدن سلگتا ہے​

صبح دم جیسے انتقاماً پھر​

آسمانوں سے آگ گرتی ہے ​

ہر طرف موت رقص کرتی ہے​

بم گھروں آنگنوں میں پھٹتے ہیں​

کتنے بے کس پڑے تڑپتے ہیں​

بچے بوڑھے سبھی بلکتے ہیں ​

جانے اس بد نصیب بستی میں ​

لوگ کس طرح زیست کرتے ہیں​

اک جہنم ہے یہ خرابوں کا ​

ایک بستی ہے یہ عذابوں کی ​

​

ڈاکٹر غلام سرور ۔ ہیوسٹن ، ٹیکساس کے مجموعہ کلام "سنگ رس " سے ایک انتخاب​

​

​

​

 

[طارق شاہ]

سید صاحب!
محسوسات کو چُھونے والی تحریر کے لئے تشکّر
انسان پڑھنے کے بعد سوچتا ہے کاش یوں نہ ہوتا

تشکّر شیئر کرنے پر
بہت خوش رہیں