چمن فاطمہ کا قلم دیکھتے ہیں - تعشق لکھنوی (سلام)

[حسان خان]

چمن فاطمہ کا قلم دیکھتے ہیں​

سلامی عجب رنگ ہم دیکھتے ہیں​

​

عجب رونقِ بزمِ غم دیکھتے ہیں​

بہارِ ریاضِ ارم دیکھتے ہیں​

​

یہاں جوشِ عصیاں، وہاں جوشِ رحمت​

گنہ گار لطف و کرم دیکھتے ہیں​

​

چھدا حلقِ اصغر تو حضرت پکارے​

ہمیں ہیں کہ ایسے ستم دیکھتے ہیں​

​

دمِ سرد بھر بھر کے لاشوں میں حضرت​

فلک کی طرف دم بدم دیکھتے ہیں​

​

جو بولا کوئی در پہ بیٹھو نہ صغرا​

کہا راہ بابا کی ہم دیکھتے ہیں​

​

وہی گھر کبھی تھا خوشی کا مرقع​

جسے آج تصویرِ غم دیکھتے ہیں​

​

شہِ دیں نے کی جس پہ برسوں ریاضت​

اُسی باغ کو ہم قلم دیکھتے ہیں​

​

دمِ ظہر کہتے تھے حضرت بہن سے​

تمہیں اور ہم کوئی دم دیکھتے ہیں​

​

تہِ تیغ ہر بار گردن اٹھا کر​

سوئے خیمہ شاہِ امم دیکھتے ہیں​

​

یہ کہتے ہیں قاتل سے دم بھر ٹھہر جا​

کہ ڈیوڑھی سے اہلِ حرم دیکھتے ہیں​

​

یہ کہتے تھے حضرت کہ افسوس اصغر​

تم آنکھیں پھراتے ہو ہم دیکھتے ہیں​

​

خدا چاہتا ہے تو چل کر تعشق​

مزارِ امامِ امم دیکھتے ہیں​

​

(تعشق لکھنوی)​