پھر کوئی آسرا نہ ہو جائے دل جگر سے جدا نہ ہو جائے

[وسیم خان]

اساتذہ سے اصلاح اور تنقید مطلوب ہے۔

پھر کوئی آسرا نہ ہو جائے
دل جگر سے جدا نہ ہو جائے

طالبِ حور میں نہیں ان سے
واں کہیں سامنا نہ ہو جائے

کیف ہے تیری بے نیازی میں
تجھ کو پاسِ وفا نہ ہو جائے

وصل کی آرزو اٹھی ہے اب
دید پہ اکتفا نہ ہو جائے

رخ نہ پھیرو صدا سے تم میری
سازِ دل ہم نوا نہ ہو جائے

 

[محمد تابش صدیقی]

پیارے بھائی اصلاح کے لیے پوسٹ کرنا ہو تو اصلاحِ سخن والے زمرہ میں پوسٹ کیجیے۔
دو مشورے

دید پہ اکتفا نہ ہو جائے

"پہ " کو اگر دو حرفی باندھنا ہو تو مناسب ہے کہ "پر" استعمال کیا جائے۔

رخ نہ پھیرو صدا سے تم میری

یہاں "میرا" ہونا چاہیے۔

باقی ان شاء اللہ اساتذہ دیکھ لیتے ہیں۔

 

[محمد تابش صدیقی]

محمد ریحان قریشی
محمد وارث
راحیل فاروق

 

[محمد خلیل الرحمٰن]

طالبِ حور تو نہیں، اُن سے

 

[وسیم خان]

تمام اساتذہ کا بہت ممنون ہوں۔ اصلاح کافی مفید معلوم ہوئی۔ شکریہ۔

 

[امجد علی راجا]

"پہ " کو اگر دو حرفی باندھنا ہو تو مناسب ہے کہ "پر" استعمال کیا جائے۔
یہاں "میرا" ہونا چاہیے۔
باقی ان شاء اللہ اساتذہ دیکھ لیتے ہیں۔

رخ نہ پھیرو صدا سے تم میری​

یہاں پر میری ہی درست ہے۔
میرا خیال ہے شاعر 'صدا سے میرا رخ' پھیرنے کی بات نہیں کر رہا بلکہ 'میری صدا سے رخ' پھیرنے کی بات کر رہا ہے۔
کیا خیال ہے محمد تابش صدیقی بھیا؟

 

[محمد تابش صدیقی]

رخ نہ پھیرو صدا سے تم میری​

یہاں پر میری ہی درست ہے۔
میرا خیال ہے شاعر 'صدا سے میرا رخ' پھیرنے کی بات نہیں کر رہا بلکہ 'میری صدا سے رخ' پھیرنے کی بات کر رہا ہے۔
کیا خیال ہے محمد تابش صدیقی بھیا؟

شعر کی بنت کے اعتبار سے میری کا اشارہ رخ کی طرف جا رہا ہے، یا پھر اگلے مصرع میں سازِ دل کی طرف۔
اگر شاعر کا مقصد "میری صدا سے رخ" ہے، تو پھر میری ہی درست ہو گا، مگر تعقید معلوم ہوتی ہے۔

 

[محمد تابش صدیقی]

ایک صلاح
رخ نہ پھیرو، مری صدا سے تم

 

[وسیم خان]

محترم تابش بھائی کی اصلاح بہت خوب ہے۔ کیا اب میں اس غزل کو پابندِ بحور شاعری کے سیکشن میں پوسٹ کر سکتا ہوں؟