امرتا پریتم میں تینوں فیر ملاں گی

[نعمان رفیق مرزا]

میں تینوں فیر ملاں گی​

کِتھے؟ کس طرح؟ پتا نہیں​

شاید تیرے تخیل دی چھنک بن کے​

تیرے کینوس تے اتراں گی​

یا ہورے تیرے کینوس دے اُتے​

اک رہسمئی لکیر بن کے​

خاموش تینوں تکدی رواں گی​

یا ہورے سورج دی لو بن کے​

تیرے رنگاں اچ گھُلا گی​

یا رنگاں دیاں باہنواں اچ بیٹھ کے​

تیرے کینوس نو ولاں گی​

پتا نئیں کس طرح، کتھے​

پر تینوں ضرور ملاں گی​

یا ہورے اک چشمہ بنی ہوواں گی​

تے جیویں جھرنیاں دا پانی اڈ دا​

میں پانی دیاں بُونداں​

تیرے پنڈے تے مَلاں گی​

تے اک ٹھنڈک جئی بن کے​

تیری چھاتی دے نال لگاں گی​

میں ہور کج نئیں جاندی​

پر اینا جاندی آں​

کہ وقت جو وی کرے گا​

اے جنم میرے نال ٹُرے گا​

اے جسم مُکدا اے​

تے سب کج مُک جاندا​

پر چیتیاں دے تاگے​

کائناتی کنا دے ہوندے​

میں انہاں کنا نو چناں گی​

تاگیاں نو ولاں گی​

تے تینوں میں فیر ملاں گی​

امرتا پریتم۔​