منقبت حضرت زینبؑ - ہمّتِ جُنبشِ لب کہاں - ساجدؔ امروہوی

[فقیر شبّیر احمد چشتی]

منقبت حضرت زینب سلام اللہ علیہا

ہمّتِ جُنبشِ لب کہاں
میں کہاں مدحِ زینبؑ کہاں

وہ تو گفتارِ زینبؑ میں تھا
لہجۂ مرتضیٰ اب کہاں

ان کے دَربارِ دُربار میں
جرأتِ عرضِ مطلب کہاں

وہ تو کہئے اُنہیں علم ہے
چاہئے کس کو، کیا، کب، کہاں

صرف طاری ہیں تاریکیاں
قید میں دن کہاں شب کہاں

یہ امیرانِ دربارِ شام
مرتبہ دانِ زینبؑ کہاں

ارضِ طیبہ، نجف، کربلا
باغِ جنّت میں یہ سب کہاں

سر پہ ہو ان کے قدموں کی دھول
ساجدؔ اپنا یہ منصب کہاں

(مرزا ساجد حسین ساجدؔ امروہوی)
گہر بخشش، صفحہ 261 - صفحہ 262​