جوش منتخب رباعیات

[حسان خان]

آتے نہیں جن کو اور دھندے ساقی
اوہام کے بُنتے ہیں وہ پھندے ساقی
جس مے کو چھڑا نہ سکا اللہ اب تک
اُس مے کو چھڑا رہے ہیں بندے ساقی​

 

[حسان خان]

ارمان ہے وہ دھوپ کہ ڈھلتی ہی نہیں
حسرت وہ شے ہے جو نکلتی ہی نہیں
مطلوب تو ہر روز بدل جاتے ہیں
کمبخت طلب ہے کہ بدلتی ہی نہیں​

 

[حسان خان]

ابنِ آدم کو صاحبِ جاہ کرو​

کمبخت کو اب اور نہ گمراہ کرو​

'اللہ' سے انسان ہے کب کا واقف​

انسان سے انسان کو آگاہ کرو​

 

[حسان خان]

مر مر کے جب اک بلا سے پیچھا چھوٹا​

اک آفتِ تازہ دم نے آ کر لوٹا​

اک آبلۂ نو سے ہوا سینہ دوچار​

جیسے ہی پرانا کوئی چھالا ٹوٹا​

 

[حسان خان]

جھجکو، ٹھٹکو نہ ایک پل بھی شرماؤ​

یہ دل تو ازل ہی سے تمہارا ہے پڑاؤ​

اے جملہ حوادث و غموم و آفات​

بندے ہی کا یہ غریب خانہ ہے در آؤ​

 

[حسان خان]

کیوں مجھ سے تقاضا ہے کہ 'پھندے کھولو'​

کس طرح کٹے یہ پاپ، بولو، بولو​

بندے کی طرف شوق سے آنا یارو​

مایوس اللہ سے تو پہلے ہو لو​

 

[حسان خان]

یہ حکم ہے، چپ سادھ لو، آنکھیں نہ اٹھاؤ​

دو خوب اذاں، دھوم سے ناقوس بجاؤ​

گوبر پہ چنے چاب کے پانی پی لو​

بستر پہ گرو، ڈکار لو اور مر جاؤ​

 

[حسان خان]

سر گھوم رہا ہے ناؤ کھیتے کھیتے​

اپنے کو فریبِ عیش دیتے دیتے​

اف جہدِ حیات! تھک گیا ہوں معبود​

دم ٹوٹ چکا ہے سانس لیتے لیتے​

 

[حسان خان]

یہ رات گئے عینِ طرب کے ہنگام​

پرتو یہ پڑا پشت سے کس کا سرِ جام​

'یہ کون ہے؟' 'جبریل ہوں' 'کیوں آئے ہو؟"​

'سرکار! فلک کے نام کوئی پیغام؟'​

 

[حسان خان]

زلفیں ہے کہ ژولیدہ خیالات کی رات​

اے جانِ حیا! ٹھہر بھی جا رات کی رات​

ان تیرہ گھٹاؤں میں کدھر جائے گی​

شانوں پہ لیے ہوئے یہ برسات کی رات​

 

[حسان خان]

ہر یارِ جفا جو کو نباہا میں نے​

سمجھا ہر زخمِ دل کو پھاہا میں نے​

لیکن اپنے سے بڑھ کے اب تک واللہ​

دنیا میں کسی کو نہیں چاہا میں نے​

 

[حسان خان]

اے خواب بتا، یہی ہے باغِ رضواں؟​

حوروں کا کہیں پتا، نہ غلماں کا نشاں​

اک کنج میں خاموش و ملول و تنہا​

بے چارے ٹہل رہے ہیں اللہ میاں​

 

[حسان خان]

دیتا نہیں بوستاں بھی سہارا مجھ کو​

کرتی نہیں بلبل بھی اشارا مجھ کو​

مرجھائے ہوئے پھول نے حسرت سے کہا​

اب توڑ کے پھینک دو خدارا مجھ کو​

 

[حسان خان]

ہر رنگ میں ابلیس سزا دیتا ہے​

انسان کو بہر طور دغا دیتا ہے​

کر سکتے نہیں گناہ جو احمق اُن کو​

بے روح نمازوں میں لگا دیتا ہے​

 

[حسان خان]

جنت کے مزوں پہ جان دینے والو​

گندے پانی میں ناؤ کھینے والو​

ہر خیر پہ چاہتے ہو ستر حوریں​

اے اپنے خدا سے سود لینے والو!​

 

[حسان خان]

تجھ سے جو پھرے گی تو کدھر جائے گی​

لے جائے گا جس سمت اُدھر جائے گی​

دنیا کے حوادث سے نہ گھبرا کہ یہ عمر​

جس طرح گزارے گا، گزر جائے گی​

 

[حسان خان]

گلشن کی روش پہ مسکراتا ہوا چل​

بدمست گھٹا ہے، لڑکھڑاتا ہوا چل​

کل خاک میں مل جائے گا یہ زورِ شباب​

جوش آج تو بانکپن دکھاتا ہوا چل​

 

[حسان خان]

قانون نہیں ہے کوئی فطرت کے سوا​

دنیا نہیں کچھ نمودِ طاقت کے سوا​

قوت حاصل کر اور مولا بن جا​

معبود نہیں ہے کوئی قوت کے سوا​

 

[حسان خان]

اک عمر تصوف نے مجھے چکرایا​

اس بحر میں ایک بھی نہ موتی پایا​

ہر مرتبہ جبکہ جال کھینچا میں نے​

تو اک نہ اک وہم اٹک کر آیا​

 

[حسان خان]

اک فتنہ ہے ناقصوں میں کامل ہونا​

اک قہر ہے وابستۂ منزل ہونا​

تاریخ کے اوراق جو الٹے تو کھلا​

اک جرم ہے احمقوں میں عاقل ہونا​